عالمي مالياتي اداري (آءِ ايم ايف) چيو آهي ته حڪومت گهٽ آمدني وارن لاءِ پيٽرول تي سبسڊي بابت ڪا مشاورت ناهي ڪئي.
بلوم برگ موجب پاڪستان ۾ آءِ ايم ايف جي نمائندي ايسٽر پيريز ٻڌايو ته پاڪستاني حڪومت پيٽروليم شين جي اگهن جي حوالي سان موٽر سائيڪل ۽ گاڏين وارن بابت اسڪيم لاءِ ڪو مشورو يا رابطو ناهي ڪيو.
هن چيو ته آءِ ايم ايف اسٽاف ان حوالي سان گڏيل تفصيل چاهي ٿو، جنهن ۾ ان اسڪيم جي ٽرمز اينڊ ڪنڊيشن، لاڳت، ٽارگيٽنگ، اسڪيم جي غلط استعمال ۽ ٻين قدمن بابت حڪومت سان انتهائي محتاط ٿي ڳالهايو ويندو.
واضح رهي ته حڪومت پيٽرول جي وڌندڙ اگهه ۽ مهانگائي کي ڏسندي پيٽرول بابت اسڪيم آڻڻ جو اعلان ڪيو آهي، جنهن تحت موٽر سائيڪل وارن کي پيٽرول تي 100 رپين تائين سبسڊي ڏني ويندي.
