حيدرآباد(رپورٽ: حسيب لطيفي) سنڌ هاءِ ڪورٽ سرڪٽ بينچ حيدرآباد جي عدالت، سنڌ پبلڪ سروس ڪميشن پاران ميونسپل آفيسرن جي ڀرتين جي لاءِ ورتل امتحان ۾ ميرٽ جي لتاڙ،نتيجن ۾ هيرا ڦيري ڪرڻ ۽ شفافيت نه هجڻ خلاف داخل درخواست تي چيف سيڪريٽري سنڌ، چيئرمين نيب، چيئرمين سنڌ پبلڪ سروس ڪميشن، سيڪريٽري لوڪل گورنمينٽ، سيڪريٽري سنڌ پبلڪ سروس ڪميشن ۽ ڪنٽرولر کي نوٽيس جاري ڪندي 22 نومبر تي جواب طلب ڪري ورتو آهي. ان سلسلي ۾ ميونسپل آفيسر جي پوسٽ لاءِ سنڌ پبلڪ سروس ڪميشن جي امتحان ۾ حصو وٺندڙ 16 اميدوارن نامياري وڪيل سجاد احمد چانڊيو جي معرفت سنڌ ھاءِ ڪورٽ حيدرآباد سرڪٽ بئنچ حيدرآباد ۾ داخل ڪرايل پٽيشن ۾ عدالت کي اپيل ڪئي آھي ته ميونسپل آفيسرن جي پوسٽ لاءِ ورتل امتحانن جا نتيجا رد ڪري نتيجن ۾ پنھنجا نوازي ۽ ڪرپشن جي جاچ لاءِ چيئرمين نيب کي حڪم جاري ڪيا وڃن.پٽيشن ۾ موقف اختيار ڪيو ويو ته ميونسپل آفيسرن لاءِ سنڌ پبلڪ سروس ڪميشن پاران جيڪي به امتحان ورتا ويا ۽ نتيجا پڌرا ڪيا ويا اھي سپريم ڪورٽ جي حڪم جي ڀڃڪڙي آھن، سپريم ڪورٽ پاران طئه ڪيل طريقي ڪار موجب سنڌ پبلڪ سروس ڪميشن پاران ھر امتحان ۽ ھر اميدوار جي انٽرويو جي سي سي ٽي وي ريڪارڊنگ جو حڪم ڏنل آھي ساڳي ريت طريقيڪار موجب سنڌ پبلڪ سروس ڪميشن ھر اميدوار جي لکت واري امتحان ۽ انٽرويو جون ڌار ڌار مارڪون جاري ڪرڻ جي پابند آھي، پر ميونسپل آفيسرن جي ورتل امتحان، انٽرويو ۽ نتيجا جاري ڪرڻ ۾ انهن سمورين ھدايتن جي ڀچڪڙي ڪئي وئي آھي، ان ڪري ميونسپل آفيسرن بابت ورتل امتحانن جا نتيجا رد ڪري ڪرپشن ۽ پنھنجا نوازي بابت جاچ لاءِ چيئرمين نيب کي حڪم جاري ڪيا وڃن. اهڙي پٽيشن تي عدالت ڌرين کي نوٽيس جاري ڪندي 22 نومبر تائين جواب طلب ڪري ورتو آهي.
