اسلام آباد (بيورو رپورٽ) صدر عارف علوي نگران وزيراعظم انوار الحق ڪاڪڙ کي لکيل خط ۾ چيو آهي ته پاڪستان تحريڪ انصاف (پي ٽي آءِ) کي سطحي راند جي ميدان ۽ بنيادي حقن بابت خدشن تي غور ڪيو وڃي.صدر پي ٽي آءِ اڳواڻ عمر ايوب جو لکيل خط به نگران وزيراعظم کي موڪلي ڇڏيو آهي.صدر پنهنجي خط ۾ چيو آهي ته نگران حڪومت لاءِ تمام ضروري آهي ته سمورين سياسي پارٽين کي ليول پليئنگ فيلڊ فراهم ڪري، بنيادي حقن ۽ليول پليئنگ فيلڊ تي پي ٽي آءِ جي خدشن تي غور ڪيو وڃي، سياسي پارٽين کي برابري جا حق ۽ موقعا ملڻ بابت توهان جا بيان اطمينان بخش آهن.صدر چيو آهي ته هو سمجهن ٿا ته جمهوريت ئي عوام ۽ پاڪستان جي رياست لاءِ صحيح رستو آهي، سياسي سرگرمين ۾ عوام جي شرڪت ۽ آزاد ميڊيا ذريعي راءِ جو اظهار جمهوريت جي روح آهي.صدر موجب آزاد، منصفاڻي ۽ مستند چونڊن تي سڄي پاڪستان ۾ اتفاق آهي، سياسي پارٽين ۽ انهن جي اڳواڻن کي چونڊن ۾ حصو وٺڻ جو حق آهي ۽ عوام کي انهن کي چونڊڻ جو حق حاصل آهي،صدر چيو ته آئين جي آرٽيڪل 41 تحت صدر، وزيراعظم ۽ سمورا ادارا شهرين جي حقن جو تحفظ ڪرڻ جا پابند آهن سياسي وابستگي رکندڙ ماڻهن جي جبري گمشدگين جي وڌندڙ واقعن بابت ميڊيا ۾ بحث هلي رهيو آهي، ماڻهن جون سياسي وابستگيون ۽ وفاداريون بدلجڻ تي اهڙا واقعا ڳڻتي جو سبب بڻجن ٿا، عورت سياسي ڪارڪنن جي ڊگهي نظربندي يا عدالت پاران رليف کانپوءِ ٻيهر گرفتاريون معاملي کي وڌيڪ حساس بڻائين ٿيون
