اسلام آباد(بيورو رپورٽ) سياسي معاملن بابت وزيراعظم جي صلاحڪار راڻا ثناءُ الله چيو آهي ته وزيراعظم هڪ ڀيرو ٻيهر خيبر پختونخواهه حڪومت ۽ پي ٽي آءِ تي زور ڏنو آهي ته اهي سياسي عدم استحڪام ۽ قومي مفادن تي پارٽي مفادن کي ترجيح ڏيڻ جي عمل کي ڇڏي ڏين ۽ ڳالهين ذريعي سڀني مسئلن کي حل ڪرڻ جي طرف اچن. بهرحال، سندس مطابق، ڳالهين جي خواهش کي رياست تي دٻاءُ وجهڻ ۽ سياسي مطالبن کي پورو ڪرڻ جي حڪمت عملي طور استعمال ڪرڻ جي اجازت نه ڏني ويندي.هن چيو ته خيبر پختونخواهه سميت ملڪ ۾ دهشتگردن خلاف انٽيليجنس تي ٻڌل آپريشن جاري رهندا، پر ڪو به نئون فوجي آپريشن شروع نه ڪيو پيو وڃي ۽ نوان اندروني طور تي بي گهر ماڻهو (آءِ ڊي پيز) پيدا ٿيڻ جو ڪو به امڪان ناهي.اسلام آباد ۾ پريس ڪانفرنس کي خطاب ڪندي رانا ثناءُ الله چيو ته دهشتگردي خلاف اڳ ۾ ئي هڪ منصوبو آهي جنهن تي عمل ڪيو پيو وڃي، جڏهن ته هٿياربند فوج ۽ قانون لاڳو ڪندڙ ادارا دهشتگرد عنصرن خلاف ڪاميابي سان آپريشن ڪري رهيا آهن. هن چيو ته ڪجهه حلقا اهو تاثر ڏئي رهيا آهن ته ڪو وڏو نئون آپريشن ڪيو پيو وڃي، جيتوڻيڪ اهو معاملو ناهي. هن چيو ته آپريشن انهن عنصرن خلاف ڪيا پيا وڃن جيڪي سيڪيورٽي فورسز ۽ عام ماڻهن تي حملو ڪري رهيا آهن ۽ اهڙين آپريشنن جي مخالفت سمجھ کان ٻاهر آهي. رانا ثناءُ الله دعويٰ ڪئي ته پي ٽي آءِ ڳالهين ۾ ڊيڊ لاڪ کان پوءِ پيدا ٿيندڙ صورتحال جي غلط تشريح ڪري رهي آهي. سندس مطابق، اهو چوڻ درست ناهي ته دهشتگردي خلاف مشاورت کي رد ڪيو ويو يا مخالف ڌر جو هن معاملي سان ڪو به تعلق ناهي. خيبر پختونخواهه ۾ امن امان جي صورتحال تي تبصرو ڪندي رانا ثناءُ الله چيو ته صوبي جا پنج ضلعا اهڙا آهن جتي پوليس اسٽيشنون نه آهن، جڏهن ته 17,000 پوليس پوسٽون خالي آهن. سندس مطابق، ڀرتي ۽ تربيت جي عمل ۾ پڻ سنگين کوٽ آهي. هن وڌيڪ چيو ته سي ٽي ڊي جو ڪل تعداد 3,300 آهي، جنهن مان صرف 25 اهلڪار مستقل آهن جڏهن ته باقي ايڊ هاڪ بنيادن تي ڪم ڪري رهيا آهن. سندس مطابق، ڪيترن ئي علائقن ۾ پوليس اسٽيشنن جون عمارتون موجود نه آهن ۽ پوليس وٽ ضروري هٿيار ۽ وسيلا نه آهن، جڏهن ته وڏو وزير چوي ٿو ته هو انهن ڪمن لاءِ نه آيو آهي. افغانستان بابت ڳالهائيندي، هن چيو ته قطر، چين، سعودي عرب ۽ ترڪي افغان طالبان کي پاڪستان جي خدشن کان آگاهه ڪرڻ ۽ انهن کي قائل ڪرڻ جي ڪوشش ڪئي، جڏهن ته، افغان طالبان گهربل يقين ڏيارڻ لاءِ تيار نه آهن.
