اسلام آباد (ويب ڊيسڪ) پاڪستان تحريڪِ انصاف ( پي ٽي آءِ ) جي اڳواڻ مشال يوسفزئي چيو آهي ته جيڪڏهن خيبرپختونخوا ۾ ايمرجنسي لڳي سگهي ٿي ته اهو وقت پري ناهي، جڏهن ڪراچي کي وفاق جي ڪنٽرول ۾ آڻڻ لاءِ سنڌ ۾ به ايمرجنسي لاڳو ٿي سگهي ٿي.
سماجي رابطن جي ويب سائيٽ ايڪس تي جاري ڪيل بيان ۾ مشال يوسفزئي، پاڪستان پيپلز پارٽي جي چيئرمين بلاول ڀٽو زرداري کي مخاطب ٿيندي چيو ته ڪنهن به ايمرجنسي سمري تي صحيح ڪرڻ کان اڳ هو پنهنجي والد آصف علي زرداري کي اها ڳالهه ضرور ٻڌائي.
هن بلاول ڀٽو زرداري جي ان موقف جو حوالو پڻ ڏنو، جنهن ۾ هن چيو هو ته جڏهن ڪنهن هڪ سياسي جماعت لاءِ سياسي گنجائش گهٽائي يا ختم ڪئي وڃي ٿي ته وقت گذرڻ سان ٻين جماعتن لاءِ به سياسي گنجائش گهٽجڻ لڳي ٿي.
مشال يوسفزئي چيو ته پاڪستان جا ماڻهو ڄاڻن ٿا ته اهڙي عمل جو آخري نتيجو ڪهڙو نڪري سگهي ٿو.
هن زور ڏنو ته جمهوريت کي بچائڻ لاءِ اڃا به وقت آهي ۽ ان سلسلي ۾ قدم کڻڻ گهرجن.
هن خبردار ڪيو ته سياسي جماعتن لاءِ سياسي گنجائش محدود ڪرڻ وارو عمل جمهوريت لاءِ نقصانڪار ثابت ٿي سگهي ٿو.
