اسلام آباد (بيورو) پاڪستان انٽرنيشنل ايئرلائنز جي نجڪاري جي عمل ۾ هڪ اهم اڳڀرائي ٿي آهي، جتي نجڪاري ڪميشن ۽ عارف حبيب ڪنسورشيم جي وچ ۾ هڪ باضابطا معاهدو طئي ٿي ويو آهي. هي اڳڀرائي قومي اسيمبلي جي نجڪاري بابت اسٽينڊنگ ڪميٽي جي اجلاس ۾ سامهون آئي، جنهن جي صدارت فاروق ستار ڪئي. اجلاس ۾، سيڪريٽري نجڪاري ڪميشن پي آءِ اي جي نجڪاري، معاهدي ۽ مستقبل جي ڪارروائي بابت تفصيلي بريفنگ ڏني. سيڪريٽري نجڪاري ڪميشن موجب، ڪامياب ڪنسورشيم حڪومت سان پنهنجو ڪاروباري منصوبو شيئر ڪندو، جڏهن ته حڪومت اڳ ۾ ئي پنهنجو منصوبو ڪنسورشيم کي فراهم ڪري چڪي آهي. ڪاروباري منصوبو مڪمل ٿيڻ کان پوءِ، اسٽينڊنگ ڪميٽي پڻ ڪنسورشيم کان بريفنگ وٺي سگهندي. اجلاس ۾ ٻڌايو ويو ته پي آءِ اي جا انتظامي ۽ آپريشنل معاملا سول ايوي ايشن اٿارٽي کي منتقل ڪيا ويا آهن، جڏهن ته سيڪيورٽيز اينڊ ايڪسچينج ڪميشن عارف حبيب ڪنسورشيم کي ڪليئر ڪري ڇڏيو آهي. ٻئي طرف، ٽرانزيڪشن دستاويزن تي صحيحن واري تقريب اسلام آباد ۾ منعقد ڪئي وئي، جنهن ۾ وزيراعظم شهباز شريف ۽ آرمي چيف فيلڊ مارشل سيد عاصم منير شرڪت ڪئي. وزيراعظم نجڪاري جي عمل کي شفاف قرار ڏيندي اميد ظاهر ڪئي ته نئون ڪنسورشيم قومي ايئر لائن کي ان جي عروج تي واپس آڻيندو. ياد رهي ته عارف حبيب ڪنسورشيم پي آءِ اي جي 75 سيڪڙو شيئرز کي 135 ارب رپين ۾ خريد ڪرڻ جي بولي کٽي ورتي هئي.
