اوٻاوڙو (رپورٽ: عبدالحئي ڇڄڻ) اوٻاوڙي لڳ رانوتي ٿاڻي جي حد ۾20 ڏينھن شھريار شر جي گاڏي تي حملي دوران مارجي ويل علي محمد شر جي قتل ۾ ڄاڻايل جوابدارن ننڍو ڀٽو ۽ اسدالله ڀٽو جي گرفتاري لاءِ گھوٽڪي ضلعي جي پوليس اٽالن جو ڳوٺ ننڍو ڀٽو تي پوليس موبائلن بڪتر بند گاڏين اي پي سي چينن سان چڙھائي حملي ۾ ڄاڻايل جوابدارن جي گھرن ۾ پيل قيمتي سامان ڪڍي گھر ڊاھي پٽ ڪري ڇڏيا، جوابدار گھر ڇڏي فرار ٿي ويا. ان موقعي تي ڳوٺ ننڍو ڀٽو جي رهواسين برڪت ڀٽو، عبداللطيف ڀٽو، فهيم ڀٽو احتجاج ڪندي ميڊيا سان ڳالهائيندي چيو ته شهريار شر تي حملي ۽ علي محمد شر قتل ڪيس ۾ منهنجي ڀائٽن ننڍو ڀٽو ۽ اسدالله ڀٽو مٿان ناحق ڪيس داخل ڪيو ويو آهي جيڪو سراسر ناحق ڪيو آھي اسان جي ڪنھن سان دشمني ناھي پر مخالفن جي چوڻ تي منھنجي ڀائٽن تي ڪيس داخل ڪيو ويو آھي، پوليس اسان جي گھرن تي چڙھائي ڪري قيمتي سامان کڻي اسان جا گھر ڊراھي پٽ ڪري ڇڏيا آھن جنھن سان اسان جو لکين رپين جو نقصان ٿيو آھي، آءِ جي سنڌ ۽ اعلي اختيارين کي اپيل آهي ته انھي واقعي جي ڪنھن ايماندار آفيسر کان شفاف انڪوائري ڪرائي انصاف ڪيو وڃي.
