ڪراچي (رپورٽر) سنڌ وومين لائيرس الائنس جي سربراهه ايڊووڪيٽ شازيه نظاماڻي، روبينه چانڊيو ۽ ٻين پنهنجي گڏيل بيان ۾ هڪ ئي ڏينهن ۾ لاڙڪاڻو ۾ مائٽن هٿان ڪارنھن الزام ۾ عورت جي قتل ۽ جيڪب آباد ۽ دودا پور ۾ مڙس هٿان ٻن عورتن جي قتل ۽ جيڪب آباد ۾ کدڙي فقير جي بيرحماڻي قتل سميت جيڪب آباد ۾ ڳورهاري عورت سان اجتماعي ڏاڍائي واري رپورٽ ٿيل واقعن جي سخت مذمت ڪندي چيو آهي ته سرداري، جرڳائي نظام ڪري جيڪب آباد، شڪارپور، ڪشمور، ڪنڌڪوٽ ۽ ٻين علائقن کي عورتن جي لاءِ غزہ جي سرزمين بڻايو پيو وڃي، شازيه نظاماڻي چيو ته عورتون هن ملڪ جون برابر جون شھري آهن انھن جو تحفظ رياست جي ذميواري آهي، پر ائين محسوس ٿي رهيو آهي ته سنڌ حڪومت پوليس کي عورتن جي قاتلن جي تحفظ جي ذميواري سونپي ڇڏي آهي،هنن چيو ته سردار زبردستي سان جرڳا ڪري عورتن مٿان ڪاري جو الزام هڻي قاتلن ۽ وحشي مرداڻي نظام کي طاقتور بڻائي ڇڏيو آهي ۽ سنڌ جا سردار اعليٰ عدالتن ۽ ملڪي آئين قانون جا باغي آهن، هنن سپريم ڪورٽ ۽ سنڌ هاءِ ڪورٽ جي چيف جسٽس کان مطالبو ڪيو آهي ته عورتن جي قتل، اغوائن، جرڳن، سڱ چٽين ۽ ڪارو ڪاري جي نظام خلاف پنهنجو ڪردار ادا ڪري سنڌ پوليس مٿان قاتلن کي گرفتار ڪرڻ لاءِ رياست طرفان ڪيس داخل ڪيو وڃي.
