حيدرآباد/دادو (رپورٽر+ ڊر)واھي پانڌي ۾ قتل ڪيل پيرسن عورت نظيران برھماڻي جو ڪيس داخل نه ٿيڻ ۽ جوابدار گرفتار نه ڪرڻ خلاف حيدرآباد ۾ سنڌياڻي تحريڪ ۽ قومي عوامي تحريڪ جي سڏ تي پريس ڪلب اڳيان مظاھرو ڪيو ويو، جنھن جي اڳواڻي سنڌياڻي تحريڪ جي جنرل سيڪريٽري نصرت خاصخيلي، ايس جي ايس ٽي جي صبا سمون، روشنا پٺاڻ، قومي عوامي تحريڪ جي نذير بليدي، غلام نبي سومرو، آغا عباس، بابو ميمڻ، گل بھار رستماڻي، اسد برھماڻي، محمد انور برھماڻي، حاجي اسلم برھماڻي، عبدالله برھماڻي، عامر برھماڻي ۽ ٻين ڪئي. ان موقعي تي سنڌياڻي تحريڪ جي مرڪزي جنرل سيڪريٽري نصرت خاصخيلي خطاب ڪندي چيو ته واھي پانڌي ۾ دھشتگردي ڪري پيرسن عورت نظيران برھماڻي کي قتل ڪيو ويو آھي. پر پوليس ڪا به ڪارروائي نه ڪئي. قومي عوامي تحريڪ جي اڳواڻ نظير بليدي خطاب ڪندي چيو ته ڏوھارين جي سرپرستي ڪراچي جو صحافي قادر لاشاري ڪري رھيو آھي، پوليس صحافي جي چوڻ تي ڏوھارين خلاف ڪا به ڪارروائي نه ڪئي آهي. هوڏانهن دادو ۾ گل حسن برھماڻي، صالح رستماڻي، ڪامريڊ امير زادي جي اڳواڻي ۾ سوين ماڻهن دادو شهر ويجهو انڊس هاءِ وي ٻرڙا شاخ وٽ ڪيترن ئي ڪلاڪن کان ڌرڻو ھڻي ويهي رهيا آهن ٻي طرف ڳوٺ احمد خان برهماڻي جا سوين ماڻهو سندن حمايت ۾ مخدوم بلاول ٿاڻي جي حد ۾ انڊس هاءِ وي تي دوداڻي موري وٽ ڪيترن ئي ڪلاڪن کان احتجاجي ڌرڻو هڻي ويٺل آهن، مظاهرين جو چوڻ هو ته اسان جي عورت جي قتل کي 4 ڏينهن گذري ويا آهن ۽ اسان مسلسل احتجاج ڪري رهيا آهيون واهي پانڌي ٿاڻي تي پڻ اسان جو گذريل 4 ڏينهن کان ڪيس داخل ڪرائڻ لاءَ احتجاجي ڌرڻو جاري آهي پر پوليس اسان جو ڪيس داخل نه ٿي ڪري.
