وزيرآباد(پ ر)جماعت اسلامي پاڪستان جي امير حافظ نعيم الرحمان چيو آهي ته دنيا پاڪستان ڏانهن ڏسي رهي آهي، نوجوان مايوس نه ٿين، فرسوده نظام خلاف وڙهن. پاڪستان سياستدانن، جنرلن يا طاقتورن جو نه پر عوام جو آهي. جماعت اسلامي نوجوانن کي ننڍن ڪاروبار لاءِ سود کان پاڪ قرض فراهم ڪرڻ شروع ڪندي. اهڙن خيالن جو اظهار هن وزيرآباد ۾ الخدمت فائونڊيشن پاڪستان تحت ننڍا ڪاروبار شروع ڪرڻ لاءِ عوام کي وياج کان پاڪ قرض فراهم ڪرڻ جي تقريب کي خطاب ڪندي ڪيو. هن چيو ته حڪمران طبقي قرض ورتا ۽ معاف ڪرايا، انهن تعليم، صحت ۽ راندين جا شعبا به تباهه ڪري ڇڏيا. ملڪ ۾ پوليس اسٽيشن جو نظام تباهه ٿي چڪو آهي، چونڊون فارم 47 تحت ٿين ٿيون، طاقت چند خاندانن تائين محدود آهي، نوجوانن کي روزگار نه ملي رهيو آهي، ۽ نئين نسل ۾ ڄاڻي واڻي ڪري مايوسي پکيڙي پئي وڃي. منشيات جو عذاب تمام گهڻو آهي. انهن حالتن ۾، جتي جماعت اسلامي پراڻي نظام جي خلاف جدوجهد ڪري رهي آهي، اتي اها بهتري لاءِ به ڪوششون جاري رکي رهي آهي، هن چيو ته الخدمت بنو قابل پروگرام جو دائرو وڌايو ويو آهي. الخدمت زيڊ ڪنيڪٽ پروگرام ذريعي نوجوانن کي آئي ٽي جي تربيت فراهم ڪري رهي آهي، جڏهن ته ڇوڪرن ۽ ڇوڪرين لاءِ ٽيڪنيڪل تربيت پڻ شروع ڪئي وئي آهي.
