ڪراچي(عدنان هاشمي)اڳوڻو فوجي آفيسر چوڌري سجاد، جيڪو اڄ به سيڪيورٽي ادارن ۾ اهم معاملن کان باخبر آهي، هن سال فيبروريءَ ۾ اڳڪٿي ڪئي هئي ته ايران ۽ افغانستان ۾ وڏي تبديلي اچڻ واري آهي، جيڪا صحيح ثابت ٿي. هن موجب هڪ ڳجهي ويهڪ ۾ ايران جي اڳوڻي بادشاه خاندان جا فرد به شامل هئا ۽ روس، چين سميت وڏيون عالمي طاقتون به واقف هيون. ايران سان لڳندڙ فارسي ڳالهائيندڙ افغان علائقن کي به هن منصوبي ۾ شامل ڪرڻو هو، پر افغانستان جي موجوده حڪومت جي بهتر ڪارڪردگي سبب اهو حصو في الحال ملتوي ٿي ويو.چوڌري سجاد چيو ته هاڻ عملي طور تي ويڙهه شروع ٿي چڪي آهي، جيڪو عالمي سطح تي ٿيندڙ تبديليءَ جي عمل تي عملدرآمد جو ثبوت آهي. جيڪڏهن ايران ۾ حڪومتي تبديلي ٿئي ٿي ته ان جا سياسي، فرقي وار، حڪمت عمليءَ وارا ۽ واپاري اثر پاڪستان تي پئجي سگهن ٿا. بلوچستان، پاراچنار، گلگت ۽ ڪراچي جهڙن علائقن ۾ فرقي واراڻا تڪرار وڌي سگهن ٿا، ايران حامي ۽ سعودي حامي ڌڙن ۾ ڇڪتاڻ شدت اختيار ڪري سگهي ٿي، جڏهن ته گوادر ۽ چين-پاڪ اقتصادي رستي تي به دٻاءُ وڌي سگهي ٿو.جيڪڏهن نئون ايراني نظام اولهه جي حمايت ڪندڙ ٿيو ته پاڪستان لاءِ پنهنجي پرڏيهي پاليسيءَ جو توازن برقرار رکڻ مشڪل ٿي سگهي ٿو. افغانستان ۾ ايراني اثر گهٽجڻ سان خطي ۾ امن امان جي صورتحال تي خطرا وڌي سگهن ٿا.
