پشاور(م ڊ) خيبرپختونخواهه جي ڪرم ضلعي ۾ خميس ڏينهن گاڏين جي قافلي تي حملي جي جواب ۾ جمعي جي رات فرقيواراڻي ويڙهه ۾ گهٽ ۾ گهٽ 32 ڄڻا مارجي ويا ۽ ڪيترائي زخمي ٿي پيا آهن، ڪرم ضلعي جي ٽن هنڌن تي اپر ڪرم جي ڳوٺ ڪنج عليزئي ۽ مقبل، لوئر ڪرم باليش خيل ۽ خار ڪلي، لوئر عليزئي ۽ بگن ۾ فائرنگ جو سلسلو اڃا تائين جاري آهي.پوليس موجب تازين قبائلي جهيڙن ۾ 30 کان وڌيڪ ماڻهو مارجي ويا آهن ۽ 100 کان وڌيڪ زخمي ٿي پيا آهن.ڪرم جي مختلف علائقن ۾ جمعي رات کان وٺي ڀڃ ڊاهه ۽ باهيون ڏيڻ جا به واقعا پيش آيا، ڪيترن ئي دڪانن ۽ گهرن کي باهه ڏني وئي، ڊسٽرڪٽ هيڊڪوارٽر اسپتال پارا چنار جي ميڊيڪل سپرنٽينڊنٽ ڊاڪٽر مير حسن جان موجب گذريل رات کان وٺي سندس اسپتال ۾ 8 لاش ۽ 50 کان وڌيڪ زخمين کي آندو ويو آهي، لوئر ڪرم جي علائقن بگن، مندوري ۽ عليزئي ۾ جهڙپ ۽ ڀڃ ڊاهه جي نتيجي ۾ ڪيترائي مارجي ويا آهن، لوئر ڪرم جي صدا اسپتال جي ڊاڪٽر رحيم ٻڌايو ته سندس اسپتال ۾ ٽن لاشن کي آندو ويو، جڏهن ته ڊاڪٽر محمد نواز، جيڪو باغن سان گڏ مندوري پرائمري هيلٿ سينٽر ۾ آهي، ٻڌايو ته سندس سينٽر ۾ 9 لاش ۽ 20 وڌيڪ آهن زخمين کي آندو ويو آهي، عليزئي ۾ 12 ڄڻا مارجي ويا آهن.واضح رهي ته خميس ڏينهن لوئر ڪرم جي علائقي بگن ۽ اچٽ ۾ 4 هنڌن تي هٿياربندن 200 گاڏين جي قافلي تي حملو ڪيو جنهن جي نتيجي ۾ عورتن ۽ ٻارن سميت 44 ڄڻا مارجي ويا ۽ 39 زخمي ٿي پيا. مارجي ويلن ۽ زخمين ۾ اڪثريت جو تعلق پارا چنار ۽ اهل شيعه برادري سان آهي. خيبرپختونخواهه جي اطلاعات کاتي موجب وزيراعليٰ خيبرپختونخواهه علي امين گنڊاپور جي هدايتن تي صوبائي قانون واري وزير آفتاب عالم ايڊووڪيٽ، چيف سيڪريٽري خيبرپختونخواهه، ڪمشنر ڪوهاٽ ڊويزن، ڊي آءِ جي ڪوهاٽ تي مشتمل هڪ وفد حالتن جو جائزو وٺڻ ۽ جرڳي کي ٻيهر فعال ڪرڻ لاءِ ڪرم پهچي ويو آهي، چيو ويو ته پاراچنار ويندڙ خيبرپختونخواهه حڪومتي وفد جي هيلي ڪاپٽر تي به اڻڄاتل ماڻهن فائرنگ ڪئي، جڏهن ته قانون واري وزير آفتاب عالم جو چوڻ آهي ته هيلي ڪاپٽر تي فائرنگ جو ڪو به واقعو ناهي ٿيو، حڪومتي وفد مڪمل طور تي محفوظ آهي.ڪرم جي ڊپٽي ڪمشنر جاويد الله محسود موجب ڪرم ۾ امن امان قائم ڪرڻ لاءِ سيڪيورٽي فورسز کي مقرر ڪيو ويو آهي جڏهن ته قبائلي اڳواڻن کان مدد ورتي پئي وڃي، ضلعي انتظاميا موجب، جي او سي 9 ڊويزن ڪوهاٽ ميجر جنرل ذوالفقار علي ڀٽي به پاراچنار پهچي ويو آهي.ٻي پاسي سينيٽ جي اسٽينڊنگ ڪميٽي واقعي جو نوٽيس وٺي ڪي پي حڪومت کان رپورٽ طلب ڪري ورتي آهي،
