ڪراچي ( م ڊ )عالمي بيئنڪ جي ڪنٽري ڊائريڪٽر ناجي بِنهسائن دعويٰ ڪئي آهي ته پاڪستان جو هاڻوڪو معاشي ماڊل ناڪارا بڻجي چڪو آهي، پاڪستان پنهنجي ساٿي ملڪن جي معاشي ماڊلز کان پٺتي رهجي ويو آهي. معاشي ترقيءَ جا فائدا رڳو مٿئين طبقي تائين محدود آهن. عالمي بينڪ جي ڪنٽري ڊائريڪٽر پاڪستان بابت پنهنجي پاليسي ويئن آرٽيڪل ۾ لکيو آهي ته ملڪ اندر ٻيهر غربت ۾ واڌ شروع ٿي وئي آهي. ملڪي ترقي جا فائدا رڳو مخصوص طبقي تائين پهچي رهيا آهن، ملڪ جي ناڪام معاشي پاليسين کي تبديل ڪرڻ لاءِ قدم کڻڻ جي ضرورت آهي، پاڪستان موسمياتي تبديلين کان گهڻو متاثر ٿيو آهي. هن چيو ته موسمياتي تبديلي جي جهٽڪن جا امڪاني تباهه ڪندڙ اثر اڳ ئي ظاهر ٿي چڪا آهن، پاڪستان کي زرعي خوراڪ ۽ توانائي جي شعبن ۾ پاليسين جي ناڪامي ۽ بگاڙ کي ختم ڪرڻ گهرجي. هن چيو ته زراعت ۾ سڌارن جي ضرورت آهي ته جيئن سبسڊيز ۽ قيمتن جي پابندين کي ختم ڪيو وڃي.