ڪراچي (رپورٽر) اي اين ايف جي مختلف ڪاررواين ۾ هڪ ٽن 364 ڪلوگرام منشيات هٿ ڪري جوابدارن کي گرفتار ڪري ورتو، اينٽي نارڪوٽڪس فورس جي ترجمان موجب 9 مختلف ڪاررواين دوران 8 جوابدارن کي گرفتار ڪري وڏي مقدار ۾ منشيات هٿ ڪئي وئي آهي. ڪراچي جي جناح انٽرنيشنل ايئرپورٽ تي ڪوئيٽا کان موڪليل پارسل مان 7 ڪلو چرس هٿ ڪيو ويو ان کان علاوه باچا خان انٽرنيشنل ايئرپورٽ پشاور تي مسافر جي ٽرالي بيگ مان هڪ ڪلو 593 گرام آئيس هٿ ڪئي وئي، موٽر وي ٽول پلازه اسلام آباد ويجهو هڪ گاڏي مان 36 ڪلوگرام آفيم ۽ 28 ڪلو 800 گرام چرس هٿ ڪيو ويو، ڪارروائي دوران 2 شڪي ماڻهن کي گرفتار ڪيو ويو، سنگجاني ٽول پلازه اسلام آباد ويجهو ٽرڪ مان 18 ڪلوگرام آفيم ۽ 12 ڪلو چرس هٿ ڪري 2 جوابدارن کي گرفتار ڪيو ويو. ملتان جي شيرشاهه ٽول پلازه وٽ گاڏي مان 4 ڪلو 800 گرام چرس ۽ 1 ڪلو آئيس هٿ ڪري جوابدار کي حراست ۾ ورتو ويو. ملتان ۾ وهاڙي چوڪ ڀرسان جوابدار وٽان 2 ڪلو 400 گرام چرس هٿ ڊيرا غازي خان ۾ ڪارروائي دوران مسافر بس ۾ سوار جوابدار وٽان 970 گرام برف هٿ. ان دوران پشين جي علائقي ڪالي پني مان 520 ڪلو آفيم، 80 ڪلو هيروئن ۽ 650 ڪلو چرس هٿ ڪئي وئي.
