اسلام آباد(م ڊ) حڪومت ملڪ ۾ ڊالر جي اسمگلنگ، ذخيره اندوزي ۽ منظم ڏوهن ۾ ملوث عنصرن خلاف وڏي پئماني تي ڪريڪ ڊائون شروع ڪري ڇڏيو آهي. سرڪاري ذريعن مطابق ڊالرن جي اسمگلنگ، ذخيره اندوزي، منظم ڏوهن جي سرپرستي ڪندڙن ۽ ان ۾ سهولتڪاري ڪرڻ ۾ ملوث سرڪاري اهلڪارن جي نشاندهي ٿي رهي آهي، انهن خلاف سخت ڪارروائي ڪئي پئي وڃي.سرڪاري اختيارين مطابق غيرقانوني، اقتصادي ۽ معاشي سرگرمين ۾ ملوث عنصرن جون مڪمل فهرستون تيار آهن ۽ انهن عنصرن خلاف وڏي پئماني تي ڪريڪ ڊائون جاري آهي. فضائي، زميني ۽ سامونڊي رستن جي نگراني جي نظام کي بهتر ڪيو ويو آهي ۽ ڪرنسي ۽ ٻين عام واهپي وارين شين جي غيرقانوني چر پر جي اجازت نه ڏني ويندي. هوڏانهن گهرو معاملن بابت نگران وفاقي وزير پنهنجي ٽوئيٽ ۾ چيو آهي، ته نگران وزيراعظم انوار الحق ڪاڪڙ جي هدايتن تي سڄي ملڪ ۾ اسمگلرن خلاف ڪريڪ ڊائون مهم شروع ڪئي وئي آهي. هن چيو ته فرنٽيئر ڪور بلوچستان افغانستان ڏانهن کنڊ جي اسمگلنگ جي ڪوشش کي ڪاميابي سان ناڪام بڻايو آهي.
