اسلام آباد(بيورو رپورٽ) نائب وزيراعظم ۽ پرڏيهي وزير اسحاق ڊار گڏيل قومن جي سلامتي ڪائونسل تي زور ڏنو آهي ته هو ڀارت پاران سنڌو طاس پاڻي معاهدي جي خلاف ورزين جو نوٽيس وٺي. گڏيل قومن ۾ پاڪستان جي مستقل نمائندي عاصم افتخار احمد ڊپٽي وزيراعظم ۽ پرڏيهي وزير اسحاق ڊار جو هڪ اهم خط گڏيل قومن جي سلامتي ڪائونسل جي صدر ۽ ڪولمبيا جي مستقل نمائندي ليونور زالباٽا ٽوريس کي حوالي ڪيو آهي. خط ۾ ڀارت پاران سنڌو پاڻي معاهدي جي مبينا خلاف ورزين تي سخت ڳڻتي جو اظهار ڪيو ويو آهي ۽ سلامتي ڪائونسل کان مطالبو ڪيو ويو آهي ته هو خطي ۾ بگڙجندڙ صورتحال جو فوري طور تي نوٽيس وٺي. پاڪستان خط ۾ موقف اختيار ڪيو آهي ته ڀارت جا عمل سنڌو پاڻي معاهدي جي روح ۽ بين الاقوامي ذميدارين جي خلاف ورزي آهن، تنهن ڪري، سلامتي ڪائونسل کي انهن واضح خلاف ورزين لاءِ ڀارت کي جوابده قرار ڏيڻ گهرجي. خط خاص طور تي سلامتي ڪائونسل جو ڌيان چناب درياءَ جي نظام سان لاڳاپيل ٻن هندستاني پاڻي جي بنيادي ڍانچي جي منصوبن ڏانهن ڇڪايو آهي. پاڪستان جو چوڻ آهي ته اهي منصوبا معاهدي جي گهرجن جي خلاف ورزي آهن ۽ خطي جي پاڻي جي توازن تي سنگين اثر پئجي سگهن ٿا. پاڪستان جي موقف موجب، هندستان پاران تڪراري پاڻي جي منصوبن جو مقصد چناب درياءَ ۾ پاڻي جي وهڪري کي متاثر ڪرڻ ۽ پاڻي کي موڙڻ آهي، جنهن سان پاڪستان جي پاڻي جي حقن تي اثر انداز ٿيڻ جو امڪان آهي.ترجمان موجب، هندستان پاڻي کي هٿيار طور استعمال ڪري رهيو آهي، جيڪو نه رڳو سنڌو پاڻي معاهدي جي خلاف آهي پر بين الاقوامي قانونن ۽ اصولن جي خلاف پڻ آهي. پاڪستان سلامتي ڪائونسل تي زور ڏنو آهي ته هو معاملي جي سنگيني تي فوري طور تي ڌيان ڏئي ۽ ڏکڻ ايشيا ۾ امن، استحڪام ۽ بين الاقوامي معاهدن جي احترام کي يقيني بڻائڻ ۾ پنهنجو ڪردار ادا ڪري.
