عراق جي طرفان کيڏندڙ زيدان اقبال فيفا ورلڊ ڪپ کيڏندڙ پهريون پاڪستاني ڄائو فٽبالر بڻجي ويندو.
زيدان اقبال جي پيءُ عامر جو تعلق پاڪستان جي علائقي ساهيوال سان آهي ۽ ماءُ عراقي آهي.
پاڪستاني ڄائي زيدان اقبال فٽبال ورلڊ ڪپ ۾ عراق جي نمائندگي ڪري رهيو آهي، 23 سالن جي مڊ فيلڊر جو ڳاڻيٽو ٽيم جي اهم رانديگرن ۾ ٿئي ٿو.
هن فٽبال جي شروعات 9 سالن جي عمر ۾ مانچسٽر يونائيٽيڊ اڪيڊمي کان ڪئي، 18 ورهين جي ڄمار ۾ چيمپئنز ليگ ۾ مانچسٽر يونائيٽيڊ جي طرفان کيڏندڙ پهريون برطانوي ۽ ڏکڻ ايشيائي رانديگر بڻيو.
2021 ۾ زيدان اقبال عراق جي انڊر 23 ٽيم طرفان کيڏيو جڏهن ته 2022 ۾ عراق جي سينئر ٽيم ۾ چونڊيو ويو، زيدان اقبال انگلينڊ ۽ پاڪستان طرفان کيڏڻ جي به اهل هو پر پاڪستان فٽبال فيڊريشن جي تڪرارن جي ڪري ان سان پهريان رابطو نه ڪري سگهيو ۽ عراق کيس پهريان کيڏائڻ ۾ ڪامياب ٿي ويو.
زيدان اقبال جو حوالي سان چوڻ آهي ته هو عراق ڪڏهن نه ويو آهي پر فٽبال کيڏڻ جي سلسلي ۾ پاڪستان وڃي چڪو آهي، پاڪستان ڏاڍو خوبصورت ملڪ آهي.
هن وڌيڪ چيو ته مون کي دوستن ۽ والد ٻڌايو ته مان ڪيئن تاريخ جو حصو بڻجڻ وارو آهيان.
