لاهور (ذوالفقار مهتو) حڪومت 200 بجلي يونٽن تائين استعمال ڪندڙن لاءِ جيڪا سبسڊي ختم ڪرڻ وڃي رهي آهي، ان سان سڄي پاڪستان ۾ غريب ۽ سفيد پوش خاندان سخت متاثر ٿيندا۔ بجلي مهانگي ٿيڻ سبب لڳ ڀڳ اسي سيڪڙو گهر متاثر ٿيندا۔ اهو وزيراعظم شهبازشريف به ٻڌي وٺي ۽ اهي ماڻهو به ٻڌي وٺن جيڪي هن پاليسي جي حمايت ڪري رهيا آهن۔هاڻي سوال اهو آهي ته اهو سڀ ڪيئن ٿيندو؟ اڄڪلهه اهو به چيو پيو وڃي ته هن مهيني جي بجلي بلن ۾ جيڪو “ڪي آر ڪوڊ” لڳايو ويو آهي، ان کي اسڪين ڪري پاڻ کي رجسٽر ڪرائڻو پوندو، نه ته سبسڊي بند ٿي ويندي۔ پهريون ته “لائف لائن ڪنزيومر” هوندا آهن۔ اهي اهي صارف هوندا آهن، جن جو لوڊ هڪ ڪلوواٽ کان گهٽ هوندو آهي۔ يعني جيڪڏهن هڪ هزار واٽ جا ڏهه بلب هلن ته اهو هڪ ڪلوواٽ لوڊ ٿيندو۔انهن لاءِ شرط آهي ته سڄو سال يا ته هر مهيني پنجاهه يونٽ استعمال ڪن يا سئو يونٽ۔جيڪي پنجاهه يونٽ استعمال ڪن ٿا، انهن کي هن وقت هڪ يونٽ ٽي رپيا پنجانوَي پئسا پوي ٿو۔ يعني پنجاهه يونٽن جو بل رڳو هڪ سئو اٺانوَي رپيا اچي ٿو۔پر جيڪڏهن اهي رجسٽريشن نه ڪرائين يا سبسڊي ختم ٿي وڃي ته پوءِ انهن تي اهو ريٽ لاڳو ٿيندو جيڪو نيپرا مقرر ڪيو آهي، يعني ڇٽيهه رپيا تيرهن پئسا في يونٽ۔ اهڙي صورت ۾ پنجاهه يونٽ استعمال ڪندڙن جو بل تمام گهڻو وڌي ويندو۔ان کانپوءِ ٻئي درجي ۾ اهي ماڻهو اچن ٿا جيڪي پنجاهه کان سئو يونٽ استعمال ڪن ٿا۔ هن وقت انهن کي هڪ يونٽ ست رپيا چوهتر پئسا پوي ٿو ۽ سئو يونٽن جو بل 774 رپيا اچي ٿو۔جيڪڏهن انهن تان سبسڊي ختم ٿي وئي ته انهن کي به 36 رپيا 13 پئسا في يونٽ ادا ڪرڻا پوندا، جنهن سان انهن جو بل ٽي هزار ڇهه سئو تيرهن رپين تائين پهچي ويندو۔ يعني لڳ ڀڳ 366 سيڪڙو واڌ ٿيندي۔هاڻي سڀ کان وڏو ڌڪ “پروٽيڪٽيڊ ڪنزيومرز” کي لڳندو، يعني اهي ماڻهو جن کي ڪيترن سالن کان تحفظ ڏنو ويو آهي۔ اهي انتهائي غريب ۽ سفيد پوش طبقي جا ماڻهو آهن، جيڪي ڪنهن کان مدد به نٿا گهرن۔ اهي اهڙا ماڻهو آهن، جن وٽ صبح جي ماني هجي ته رات جي ماني جي پڪ ناهي هوندي۔ پروٽيڪٽيڊ ڪنزيومرز لاءِ شرط آهي ته سندن لوڊ پنج ڪلوواٽ کان گهٽ هجي ۽ لڳاتار ڇهه مهينا يا ته سئو يونٽ يا وڌ ۾ وڌ ٻه سئو يونٽ استعمال ڪن۔هاڻي هڪ کان سئو يونٽ استعمال ڪندڙن کي ڏسو۔ هن وقت انهن کي هڪ يونٽ ڏهه رپيا چوَنجهٺ پئسا پوي ٿو۔ جيڪڏهن اهي سئو يونٽ استعمال ڪن ته سندن بل هڪ هزار چوَنجهٺ رپيا اچي ٿو۔جيڪڏهن سبسڊي ختم ٿي وئي ته انهن لاءِ يونٽ جو اگهه 34 رپيا 55 پئسا ٿي ويندو۔ اهڙي صورت ۾ سندن بل ٽي هزار 450 رپيا ٿي ويندو، يعني 220 سيڪڙو واڌ۔ساڳي طرح هڪ سئو هڪ کان ٻه سئو يونٽ استعمال ڪندڙن لاءِ هن وقت يونٽ جو اگهه تيرهن رپيا هڪ پئسو آهي۔ سندن بل لڳ ڀڳ تيرهن سئو هڪ رپيو اچي ٿو۔پر سبسڊي ختم ٿيڻ کانپوءِ يونٽ جو اگهه اوڻٽيهه رپيا ڇهه پئسا ٿي ويندو ۽ سندن بل ٻه هزار نَو سئو ڇهه رپيا ٿي ويندو، يعني 130 سيڪڙو اضافو۔ اڳ جيڪي پروٽيڪٽيڊ ڪنزيومرز هئا، انهن جو انگ ٻارهن لک سٺ هزار هو، جڏهنته هاڻي جيڪي پروٽيڪٽيڊ صارف آهن، انهن جو انگ هڪ ڪروڙ سٺ لک آهي۔
