اسلام آباد(عاصمه شيرازي)ايراني پاسدارانِ انقلاب دعويٰ ڪئي آهي ته تازن حملن ۾ پنج سئو آمريڪي فوجي ماريا ويا آهن. ايران طرفان اهو به اعلان ڪيو ويو آهي ته هنن سعودي عرب ۾ موجود آمريڪي پرنس سلطان ايئربيس کي تباهه ڪيو آهي، ۽ اهي خبرون هاڻي تصديق ٿيل ٻڌايون پيون وڃن.خاتم الانبياء مرڪزي هيڊ ڪوارٽر اعلان ڪيو آهي ته گڏيل عرب امارات ۾ آمريڪي فوج جي يوڪريني اينٽي ڊرون سسٽم کي به نشانو بڻايو ويو آهي، جتي 21 يوڪريني شهري به موجود هئا. ان کان علاوه گڏيل عرب امارات ۾ هڪ اسٽريٽيجڪ اليڪٽرانڪ وارفيئر سينٽر کي به نشانو بڻائڻ جي دعويٰ ڪئي وئي آهي.ايراني پاسداران طرفان اهو به چيو ويو آهي ته اسرائيلي اي ايل ٽي اي سسٽم کي حيفا پورٽ تي ڊرونز ذريعي تباهه ڪيو ويو آهي. اهڙي طرح هڪ ايف-16 جهاز کي به فارس صوبي ۾ مارڻ جي دعويٰ ڪئي وئي آهي، ۽ آمريڪي ايم ڪيو-9 ڊرون کي به شيراز جي ويجهو نشانو بڻايو ويو آهي. انهن دعوائن موجب ايران کي اهم ڪاميابيون مليون آهن.پاسداران اهو به چيو آهي ته ايندڙ مرحلي ۾ خطي ۾ آمريڪي ۽ اسرائيلي يونيورسٽيون به جائز هدف هونديون. ياد رهي ته تهران ۽ اصفهان جي سائنس ۽ ٽيڪنالاجي يونيورسٽين کي اڳ ۾ نشانو بڻايو ويو هو، جنهن جي جواب ۾ هاڻي ايران خطي ۾ آمريڪي يونيورسٽين کي نشانو بڻائڻ جي ڳالهه ڪري رهيو آهي. ٻئي پاسي آمريڪا بابت رپورٽون آهن ته پينٽاگون ايران خلاف زميني ڪاررواين جي تياري ڪري رهيو آهي. واشنگٽن پوسٽ موجب آمريڪا خاص آپريشنز فورسز ۽ روايتي پيادل فوج ذريعي محدود زميني ڪارروايون ڪرڻ تي غور ڪري رهيو آهي، مڪمل جنگ بدران ڇاپا مار نوعيت جون ڪارروايون ٿي سگهن ٿيون،ٻئي طرف آمريڪا جي اندر به صورتحال مختلف آهي. ڪيترن شهرن ۾ “نو ڪنگز” نالي احتجاج ٿي رهيا آهن، جيڪي صدر ٽرمپ جي پاليسين ۽ ايران خلاف جنگي قدم جي مخالفت ۾ آهن. نيو يارڪ، لاس اينجلس ۽ واشنگٽن سميت ڪيترن وڏن شهرن ۾ هزارين ماڻهو احتجاج ڪري رهيا آهن.سروي موجب آمريڪي عوام جي اڪثريت ايران خلاف فوجي ڪارروائي جي حمايت نٿي ڪري. هڪ سروي مطابق لڳ ڀڳ 59 سيڪڙو ماڻهن ان عمل کي غلط قرار ڏنو آهي، جڏهن ته صرف 38 سيڪڙو ان جي حمايت ڪئي آهي. ان مان ظاهر ٿئي ٿو ته آمريڪا جي اندر به حڪومت تي دٻاءُ وڌي رهيو آهي.ترڪي جي پرڏيهي وزير اهم بيان ڏنا آهن ته خطي جا ڪجهه نار وارا ملڪ ايران خلاف ڪارروائي ڪري سگهن ٿا، جنهن سان وڏي پيماني تي ري ايڪشن پيدا ٿي سگهي ٿو، جيڪو ڊگهي عرصي تائين اثرانداز ٿي سگهي ٿو. هن زور ڏنو ته ڳالهين کي جاري رکڻ گهرجي، تڪڙ ۾ فيصلا نه ڪيا وڃن ۽ صبر سان ڪم ورتو وڃي.روس جي حوالي سان به چيو پيو وڃي ته هو ايران جي حمايت ڪري رهيو آهي ۽ ڪجهه اهم هدف حاصل ڪرڻ ۾ مدد فراهم ڪري رهيو آهي.
