اسلام آباد (بيورو) اسلام آباد ۾ وڻن جي واڍي تي مخالف ڌر ۽ حڪمران اتحاد جون پارٽيون هڪ ئي موقف تي اچي ويون.  مطالبو  ڪيو ويو ته معاملي کي قومي اسيمبلي جي اسٽينڊنگ ڪميٽي آن انوائرمينٽ ڏانهن موڪليو وڃي. پي پي پي جي شازيا مري چيو ته شڪرپڙيان سميت مختلف علائقن ۾ هزارين وڻ ڪٽڻ جون رپورٽون آهن، جيڪو هڪ تمام سنجيده معاملو آهي. پي ٽي آءِ جي علي محمد خان چيو ته پولن جي ڪري جهنگلي توت جي وڻن جي ڪٽائي ڪجهه حد تائين سمجهه ۾ اچي ٿي، پر 40 کان 50 سال پراڻا وڻ ڇو ڪٽيا پيا وڃن؟ ايم ڪيو ايم جي فاروق ستار چيو ته شهر ۾ اڏاوتن جي ڪري ڪجهه پراڻا وڻ به ڪٽيا ويا، جيڪو نه ٿيڻ گهرجي ها. گهرو معاملن واري مملڪتي وزير طلال چوڌري وڻن جي ڪٽائي کي اسلام آباد جي ماسٽر پلان سان ڳنڍيندي چيو ته شهر جي ماسٽر پلان تحت ڪجهه هنڌ سائي هجڻ گهرجن جڏهن ته ڪجهه کي عمارتن ۽ انفراسٽرڪچر لاءِ استعمال ڪيو وڃي ها. انفراسٽرڪچر لاءِ ڪٽيل وڻن جي جاءِ تي ٻيڻا وڻ لڳايا ويا آهن ۽ اسلام آباد هاڻي اڳ کان وڌيڪ سرسبز ۽ محفوظ آهي.

مصدق ملڪ وڻن جي واڍي جو جائزو وٺڻ شڪر پڙيان پهچي ويو

اسلام آباد (بيورو) وفاقي وزير مصدق ملڪ شڪرپڙيان جو دورو ڪيو ۽ وڻن جي ڪٽائي جو جائزو ورتو. ميڊيا سان ڳالهائيندي  مصدق ملڪ چيو ته هو ڏسڻ آيو آهي ته ڪهڙا وڻ ڪٽيا ويا آهن. جيڪڏهن ڪا به غفلت يا لاپرواهي ملي ته ڪارروائي ڪئي ويندي. اهو لڳي ٿو ته ڪيترائي وڻ محفوظ به ڪيا ويا آهن. انهن وڻن جي ڳڻپ ڪرڻ اي پي اي جي ذميواري آهي. جيڪڏهن تعميراتي منصوبا اي پي اي جي هدايتن تي عمل نه ڪندا ته سبب ڏيکاريو نوٽيس پڻ جاري ڪيا ويندا. وڻن کي ڪٽڻ ۽ ٻيهر لڳائڻ سي ڊي اي جي ذميواري آهي.

اسلام آباد ۾ وڻ وڍي هائوسنگ سوسائٽيون پيون ٺهن:حامد مير

اسلام آباد(عوامي آواز رپورٽ) موسمياتي تبديلي واري وفاقي وزير ڊاڪٽر مصدق ملڪ اعلان ڪيو آهي ته جهنگلي  شهتوت سميت ماحول دوست وڻ ڪٽڻ وارن ۽ شڪر پڙيان ۾ هائوسنگ اسڪيم شروع ڪرڻ وارن کي نوٽيس جاري ڪيو ويندو۔ماحوليات جي ماهر ڊاڪٽر زينب جو چوڻ آهي ته صرف نر شهتوت جو وڻ  پيدا ڪري ٿو، جڏهن ته مادي وڻ الرجي نه ٿو پيدا ڪري،ٻئي پاسي سينئر صحافي حامد مير چيو آهي ته هي ته ڪو اسلام آباد ۾ رهندڙ ماڻهن کان پڇي ته اسلام آباد ۾ اصل ۾ ڇا ٿي رهيو آهي؟ سڀئي غير سرڪاري ماحولياتي ماهر چئي رهيا آهن ته اسلام آباد ۾ ترقي (ڊويلپمينٽ) جي نالي تي وڻن جو کليل عام قتل عام ڪيو پيو وڃي۔ گذريل ٽيهن سالن کان اسان اهو ٻڌندا پيا اچون ته جهنگلي شهتوت جا وڻ ڪٽيا پيا وڃن، پر حقيقت ۾ هر قسم جا وڻ ڪٽي، انهن جي جاءِ تي هائوسنگ سوسائٽيون ٺاهي پلاٽ وڪرو ڪيا پيا وڃن۔