اسلام آباد (بيورو) پرڏيهي آفيس جي ترجمان طاهر اندرابي چيو آهي ته دهشتگردن جي حمايت ختم ٿيڻ تائين افغانستان سان واپار بحال نه ڪيو ويندو. جمعي تي هفتيوار بريفنگ ۾، هن چيو ته پاڪستان  وٽ واپار معطل ڪرڻ کان سواءِ ٻيو ڪو به آپشن نه بچيو آهي، ڇاڪاڻ ته افغانستان طرفان پاڪستاني واپارين ۽ واپاري سرگرمين تي حملا ڪيا ويا آهن. ترجمان چيو ته "پاڪستان پنهنجي شهرين جي جان جي قيمت تي افغانستان سان واپار جاري نٿو رکي سگهي،” وڌيڪ چيو ته پاڪستان ڪيترائي ڀيرا سيڪيورٽي ۽ واپار کي الڳ رکڻ جي ڪوشش ڪئي آهي، پر افغانستان کان حملا جاري آهن. هن چيو ته پاڪستان ۽ افغانستان جي وچ ۾ سفارتي رابطا برقرار آهن ۽ ٻنهي ملڪن جا سفارتخانا معمول مطابق ڪم ڪري رهيا آهن. ڪيترن ئي ملڪن پاڪ-افغان ٽياڪڙي جي آڇ ڪئي آهي. ترڪ صدر جي وفد جي پاڪستان جي دوري جو منصوبو نائب صدر جي پرڏيهي دورن جي ڪري ملتوي ڪيو ويو آهي. طاهر اندرابي وڌيڪ چيو ته پاڪ-ڀارت تڪرار جي حوالي سان آمريڪي ڪانگريس جي تحقيقي رپورٽ جاري ڪئي وئي آهي، پاڪستان خطي ۾ تڪرار گهٽائڻ ۽ غزا ۾ جنگ بندي حاصل ڪرڻ ۾ آمريڪا جي ڪردار جي تعريف ڪري ٿو.

ڀارت افغانستان ذريعي پاڪستان کي پريشان ڪرڻ چاهي ٿو:خواجا آصف

اسلام آباد(م ڊ) بچاءُ واري وفاقي وزير خواجا محمد آصف چيو آهي ته ڀارت افغانستان جي ذريعي پاڪستان کي پريشان ڪرڻ جي ڪوشش ڪري رهيو آهي پر هي پراڪسي جنگ جو حصو آهي،  ميڊيا سان ڳالهائيندي خواجا آصف  چيو ته جنگ جو خطرو ٽريو ناهي. خواجا آصف چيو ته ڀارت افغانستان جي ذريعي پاڪستان کي پريشان ڪرڻ جي ڪوشش ڪري رهيو آهي ۽ پراڪسي جنگ ڪڏهن به ختم نه ٿي هئي. تازن واقعن کان پوءِ ڀارت هڪ دفعو ٻيهر  پراڪسي جنگ جو رستو اختيار ڪري رهيو آهي. خواجا آصف چيو ته اهو نه سمجهڻ گهرجي ته جنگ جو خطرو ٽري چڪو آهي،  خواجا آصف چيو ته آمريڪا بابت فيلڊ مارشل جو ڪردار اهم رهيو آهي، ماضي ۾ باني پي ٽي آءِ فون جو انتظار ڪندا رهيا، ٽرمپ مداخلت ڪري جنگن کي بند ڪيو، افغانستان جي معاملي تي اسان کي پنهنجي دوست ملڪن جو خيال آهي، اهي پوءِ چوندا ته اهي بس رڳو جنگ ڪرڻ چاهين ٿا.هن پنهنجي گفتگو ۾ چيو ته قطري، سعودي، يو اي اي ۽ چين جو انهن تي اثر آهي، اسان پنهنجي دوستن کي امن جي ڪوششن لاءِ مڪمل وقت ڏيڻ چاهيون ٿا، جڏهن اهي چوندا ته هاڻي توهان وڃو ۽ توهان جا پاڙيسري، ۽ جيڪڏهن ضد جاري رکڻ جو طريقو اپنائڻا ته اها صورتحال جلدي خراب ٿي سگهي ٿي. وزير دفاع وڌيڪ چيو ته اسان چاهيون ٿا ته امن جي ڪوشش کي موقعو ڏنو وڃي، افغانستان جو اهو چوڻ ته اسان جا ماڻهو ملوث نه هئا، اهو ٺيڪ ناهي، وانا ۾ سڀ افغان هئا.

ڪي پي ۾ فورسز جو آپريشن، 13 دهشت گرد مارجي ويا

پشاور  (م ڊ) خيبرپختونخوا ۾ سيڪيورٽي فورسز جي ٻن الڳ الڳ آپريشنز ۾ ڀارتي مدد يافته 13 دهشتگرد مارجي ويا، آءِ ايس پي آر موجب 20-21 نومبر تي ڪي پي ۾ ٻن آپريشنز دوران دهشت  گردن کي نشانو بڻايو ويو. لڪي مروت ضلعي جي عمومي علائقي پهاڙ خيل ۾ خوارجن جي موجودگي جي اطلاع تي، سيڪيورٽي فورسز ۽ قانون نافذ ڪندڙ ادارن گڏيل انٽيليجنس بنياد تي آپريشن ڪيو، آپريشن دوران شديد فائرنگ جي ڏي وٺ کان پوءِ 10 دهشت گرد مارجي ويا، ڊيره اسماعيل خان ضلعي ۾ هڪ ٻي انٽيليجنس بنياد تي آپريشن ۾ فورسز ٽن دهشت گردن کي ماري ڇڏيو، آءِ ايس پي آر موجب مارجي ويل ڀارتي مدد يافته خوارجين وٽان هٿيار ۽ گولا باردو برآمد ڪيو ويو. آءِ ايس پي آر وڌيڪ ٻڌايو ته علائقي ۾ باقي ڀارتي مدد يافته خوارجين کي ختم ڪرڻ لاءِ سينيٽائيزيشن آپريشنز جاري آهن، ڇو ته پاڪستان جون سيڪيورٽي فورسز ۽ قانون نافذ ڪندڙ ادارا غير ملڪي مدد يافته ۽ اسپانسر ڪيل دهشتگردي جي خطري کي ختم ڪرڻ لاءِ وفاقي ايپيڪس ڪميٽي جي قومي ايڪشن پلان تحت منظور ٿيل ويزن عزم استحڪام تحت جاري ڪائونٽر ٽيررزم مهم کي تيزي سان جاري رکندا.

ڪي پي ۾ ڪارروائي دوران  آمريڪي ۽ نيٽو  جا هٿيار هٿ

پشاور(م ڊ) پاڪ فوج ۽ قانون لاڳو ڪرڻ وارن ادارن  خيبر پختونخوا ۾ دهشت گردن خلاف ڪارروائي ڪندي افغانستان ۾ استعمال ٿيندڙ آمريڪي ۽ نيٽو فوجن جا هٿيار هٿ ڪيا آهن .  سيڪيورٽي ذريعن مطابق،  هي ڪارروائيون  خيبر پختونخوا جي مختلف ضلعن ۾ ڪيون ويون، جتي دهشتگردن کان آمريڪا ۽ نيٽو فوجن جا استعمال ٿيل  هٿيار برآمد ڪيا ويا، جيڪو ميڊيا جي سامهون پيش ڪيو ويو آهي. ذريعن چيو ته قانون لاڳو ڪندڙ ادارن  هٿيار دهشتگردن کان مختلف آپريشنز دوران برآمد ڪيا، جن ۾ ايم 4، ايم 16 ۽ ٻيا خودڪار جديد اوزار شامل آهن.  ذريعن جو وڌيڪ چوڻ آهي ته آمريڪي ۽ نيٽو فوجن جي افغانستان مان  نڪرڻ کان پوءِ وڏو هٿيار ڇڏيو ويو . اهي هٿيار هاڻي پاڪستان ۾ دهشتگردن جي هٿن ۾ اچي چڪو آهي، جيڪو ملڪ جي سلامتي لاءِ نئون چيلينج بڻجي چڪو آهي.

اسرائيل ايران ۾ افغان پناهگيرن کي جاسوسي لاءِ ڀرتي ڪيو: آمريڪي عملدار

واشنگٽن (م ڊ) سي آءِ اي جي هڪ اڳوڻي آفيسر انڪشاف ڪيو آهي ته اسرائيل ايران ۾ هزارين افغان پناهگيرن کي جاسوسي لاءِ ڀرتي ڪيو. سي آءِ اي جي اڳوڻي آفيسر جان ڪرياڪو هڪ انٽرويو ۾ چيو  ته اسرائيلي ايجنٽن افغان پناهگيرن کي ڪنهن به آفيسر جي حرڪتن بابت آگاهي ڏيڻ جو ڪم ڏنو. جان ڪرياڪو جي مطابق، اسرائيل هن ڪم لاءِ هڪ سو ڊالر ادا ڪيا، ان ڪري هزارين افغان پناهگيرن کي جاسوسي ۾ ملازمت ڏني.

جڊيشل ڪمپليڪس حملي ڪيس جو وڌيڪ هڪ سهولتڪار گرفتار

اسلام آباد (بيورو) حساس ادارن راولپنڊي اسلام آباد ۾ ڪارروائي ڪندي اهم جوابدار کي گرفتار ڪري ورتو، سڪيورٽي ذريعن موجب سڪيورٽي اهلڪارن جي-11 اسلام آباد ۾ جڊيشل ڪمپليڪس تي حملو ڪرڻ واري هڪ ٻئي سهولتڪار کي گرفتار ڪيو، ذريعن ٻڌايو ته جوابدار جمشيد خودڪش جيڪٽ پشاور کان اسلام آباد پهچائڻ ۾ سهولت فراهم ڪري رهيو هو، جوابدار پنهنجي لوڊر رڪشا ۾ خودڪش جيڪٽ پشاور کان اسلام آباد پهچائي، جوابدار کي جاچ لاءِ اڻڄاتل هنڌ منتقل ڪيو ويو، جتي ان کان وڌيڪ معلومات حاصل ڪئي ويندي.