ڪراچي (رپورٽر) سنڌ هاءِ ڪورٽ جي چيف جسٽس محمد جنيد غفار فل ڪورٽ ريفرنس ۾ خطاب ڪندي چيو آهي ته مان هن عدالت ۾ آخري ڀيرو جج طور موجود آهيان ۽ پنهنجي آئيني عهدي کي الوداع چئي رهيو آهيان. هن چيو ته هو جلد بار ۾ هوندو ۽ سپريم ڪورٽ بار جي اليڪشن لاءِ ووٽ گهرندو. جسٽس جنيد غفار چيو ته 1993ع ۾ وڪالت شروع ڪئي ۽ 2000ع ۾ هاءِ ڪورٽ ۾ انرول ٿيو، روزانو صبح ساڍي اَٺين وڳي ٽيڪس ڊبل بئنچ ۾ موجود هوندو هئس ۽ پنهنجن جونيئرن کي به اها هدايت ڪندو هئس ته وقت سر عدالت ۾ پهچن. وقت جي پابندي تي سختي ڪرڻ سبب سخت جج سمجهيو ويندو هو. مان ڪڏهن سوچيو به نه هو ته جج بڻجندس، 2011 ۽ 2012 ۾ به منهنجو نالو جڊيشل ڪميشن ڏانهن نه موڪليو ويو هو. هن چيو ته جج ٿيڻ نوڪري نه پر اعزاز آهي، نوجوان وڪيل محنت ڪن ته صلو ضرور ملندو.
