اسلام آباد/ پشاور/ لاهور (م ڊ) پي ٽي آءِ باني عمران خان جي آزادي سميت مطالبن جي مڃتا لاءِ ڪي پي ڪي جي وڏي وزير علي امين گنڊاپور ۽ بشريٰ بي بي جي اڳواڻي ۾ پشاور کان نڪتل پي ٽي آءِ جو قافلو اسلام آباد جي حدن ۾ پهچي ويو، پنهنجي منزل طرف روان دوران آهي، پشاور مان نڪتل قافلو برهان انٽرچينج وٽ رات گذارڻ کانپوءِ اسلام آباد روانو ٿيو، جيڪو رڪاوٽون ٽوڙي رات دير سان اسلام آباد جي علائقي چورنگي 26 پهتو، قافلي ۾ صوبائي وزير ۽ پي ٽي آءِ اڳواڻ ڪارڪنن شامل آهن، مختلف هنڌن تي چڪرين دوران پوليس تي پٿراءُ ڪيو ويو، هڪلا انٽرچينج وٽ مظاهرين جي تشدد ۾ پنجاب پوليس جو سپاهي مبشر شهيد ٿي ويو، جڏهن ته ڪيترائي اهلڪار زخمي ٿي پيا، پوليس ڪيترن ئي ڪارڪنن کي گرفتار پڻ ڪيو، ڪٽي پهاڙي وٽ فائرنگ ۾ 2 اهلڪار زخمي ٿي پيا، اٽڪ ۾ چڪرين دوران 23 اهلڪار زخمي ٿيا، شهيد اهلڪار جي جنازي نماز ۾ وفاقي وزير محسن نقوي ۽ ٻيا شريڪ ٿيا، بعد ۾ گهرو وزير سان گڏ مياڊيا سان ڳالهائيندي آءِ جي پنجاب ڊاڪٽر عثمان چيو ته تشدد ۾ 119 پوليس اهلڪار زخمي ٿيا آهن، پوليس جي 22 گاڏين کي نقصان پهتو آهي، وفاقي گهرو وزير محسن نقوي چيو ته گولي جو جواب گولي سان ڏيڻ آسان هو، پر پوليس گولي جو جواب ڳوڙها آڻيندڙ گئس يا رٻڙ بلٽ سان ڏنو، جن احتجاج جو سڏ ڏنو، جن ماڻهن کي گهرايو انهن کي نه ڇڏينداسين، پوليس اهلڪار جي قتل جو ڪيس انهن سڀني تي داخل ڪيو ويندو، شهيدن جو خون رائيگان نه ويندو، وزيراعظم شهباز شريف چيو آهي ته نام نهاد پرامن احتجاج جي نالي تي پوليس اهلڪارن تي حملا مذمت جوڳا آهن، 9 مئي ٻيهر وڳوڙ ڪندڙ ٻيهر پرتشدد ڪارروايون ڪري رهيا آهن، ڪانسٽيبل مبشر کي ملڪ جي ترقي سان دشمني ڪندڙ ٽولي شهيد ڪيو، شرپسندن شهيد سپاهي جي ٻارن جي دنيا اجاڙي ڇڏي آهي، وزيراعظم واقعي ۾ ملوث ماڻهن جي نشاندهي ڪري کين سزا ڏيڻ ۽ زخمي اهلڪارن کي بهترين طبي سهولتون فراهم ڪرڻ جي هدايت ڪئي، پنجاب جي سڌ سماءَ واري وزير عظميٰ بخاري لاهور ۾ پريس ڪانفرنس ڪندي چيو آهي ته پي ٽي آءِ ڪارڪنن جي تشدد سبب هڪ پوليس اهلڪار مارجي ويو ۽ 70 زخمي ٿي پيا آهن، ٻين 5 اهلڪارن جي حالت نازڪ آهي، پوليس اهلڪارن کي ڳچيءَ ۽ پيرن ۾ گوليون لڳيون آهن، فائرنگ ڪندڙ يوٿ فورس جا ماڻهو آهن جن کي ٻاهران آندو ويو هو، اهلڪارن جي سرن کي نشانو بڻائڻ طالبان جو طريقو آهي، پي ٽي آءِ جي ايجنڊا آهي ته رياست گوليون هلائي ته کين لاش ملن، اهي ڪالهه به دهشتگرد هئا ته اڄ به دهشتگرد آهن، عمران خان جي هوندي ملڪ جو ڀلو نه نٿو ٿي سگهي، هي جماعت 9 مئي جو پارٽ 2 چاهي ٿي، بشريٰ ڌاڙيل سلطانه جو ڪردار ادا ڪري رهي آهي، پي ٽي آءِ جي باني عمران خان جي گهرواري بشريٰ بي بي احتجاجي ريلي کي خطاب ڪندي چيو ته جيستائين عمران خان اسان وٽ نه ايندو تيستائين اهو مارچ ختم نه ڪنداسين، هن چيو ته آئون آخري دم تائين بيٺي رهنديس ۽ توهان کي منهنجو ساٿ ڏيڻو پوندو، جيڪڏهن ڪير منهنجو ساٿ نه ڏيندو ته به بيٺي هونديس ڇو ته هي صرف منهنجي مڙس جو معاملو نه آهي پر هن ملڪ ۽ ان جي ليڊر جي ڳالهه آهي، مون کي يقين آهي ته پٺاڻ غيرتمند قوم آهي، اها آخري دم تائين ساٿ نه ڇڏيندي، بشريٰ بي بي الله اڪبر جو نعرو هڻي تقرير ختم ڪئي.ميڊيا سان ڳالهائيندي علي امين گنڊاپور چيو ته اسين ٻيڙا ساڙي نڪتا آهيون هر حال ۾ ڊي چوڪ تي پهچنداسين، پي ٽي آءِ جي احتجاج سبب انٽرنيٽ سروس ۽ ٽرانسپورٽ بند آهي، اڄ اسلام آباد ۽ پنڊي ۾ تعليمي ادارا بند رکڻ جو فيصلو ڪيو ويو، رستا بند هجڻ ڪري اسلام آباد، راولپنڊي، لاهور ۾ پيٽرول ۽ ڊيزل جو اسٽاڪ ختم ٿيڻ جو خدشو ظاهر ڪيو ويو آهي، هوڏانهن پنجاب ۾ لاڳو قلم 144 ۾ ٽن ڏينهن جي واڌ ڪئي وئي آهي.
اسلام آباد(م ڊ) احتجاج جي حوالي سان حڪومت ۽ تحريڪ انصاف وچ ۾ ڳالهين بنا نتيجي ختم ٿي ويو، وفاقي گهرو وزير محسن نقوي ۽ پي ٽي آءِ چيئرمين بئريسٽر گوهر ۽ خيبرپختونخواهه جي سڌ سماءَ واري صلاحڪار بئريسٽر سيف جي وچ ۾ ڳالهيون ٿيون، ذريعن موجب پي ٽي آءِ پريڊ گرائونڊ يا پشاور موڙ تي ڌرڻي جي آڇ ڪري ڇڏي، ذريعن جو چوڻ آهي ته پي ٽي آءِ اڳواڻ پي ٽي آءِ باني کي فوري طور آزاد ڪرڻ جي مطالبي تي قائم آهن ۽ موقف اختيار ڪيو آهي ته جيڪڏهن پي ٽي آءِ باني کي فوري طور آزاد نه ڪيو ويو ته هو ڊي چوڪ تي پهچندا.ٻئي پاسي بئريسٽر گوهر،شبلي فراز ۽ اسد قيصر عمران خان سان ٻيهر ملاقات ڪئي ۽ حۡڪومتي تجويزن کان اگاهه ڪيو،عمران خان هڪ تجويز تي اتفاق ڪيو آهي،جڏهن ته هن بئريسٽر گوهر کي وڊيو پيغام رڪارڊ ڪرايو،ذريعن موجب ڳالهين ۾ بريڪ ٿرو جو امڪان آهي.
اسلام آباد(م ڊ) وفاقي گهرو وزير محسن نقوي رات دير سان ڊي چوڪ پهچي جائزو ورتو، ان موقعي تي ميڊيا سان ڳالهائيندي هن چيو ته اسان جي ڪوشش آهي ته مظاهرين کي ڊي چوڪ تي وڃڻ نه ڏيون ۽ ڪو به جاني نقصان نه ٿئي، هن چيو ته جيڪو به ڊي چوڪ پهچندو اهو گرفتار ٿيندو، احتجاج ڪرڻ هنن جو حق آهي پر هر ڀيري ڪنهن اهم موقعي تي ڇو؟ ٿورو انتظار ڪريو، آئون کلي ڳالهائيندس.ڪي به ڳالهيون نه پيون ٿين، صبر جو مظاهرو ڪريون پيا، پر حد پار ڪندا ته شهرين جي حفاظت ته ڪنداسين.
