واشنگٽن(ڊي ڊبليو)خيبرپختونخوا جي وڏي وزير علي امين گنڊاپور جي قافلي ۾ 40 هزار کان وڌيڪ ماڻهو موجود هجڻ بابت پي ٽي آءِ جي ماڻهن جي دعويٰ ڪئي جڏهن ته حڪومت اهو انگ 3 هزار ٻڌائي ٿي. اڻ ڌريا ماڻهو اهو انگ 10 هزار کان وڌيڪ ٻڌائين ٿا. اها به ڪجهه ماڻهن تصديق ڪئي ته کوڙ ماڻهو واپس ويا جنهن جي ڪري هاڻي احتجاج ۾ ماڻهن جو انگ گهٽيو آهي. آچر جي رات علي امين گنڊاپور ۽ بشريٰ بي بي مک قافلي کان هٽي برهان طرف هليا ويا هئا جيڪا ڳالهه قافلي ۾ شريڪ ماڻهن کي نه وڻي. هنن چيو ته قافلي جي سفر ۾ 3 ڀيرا علي امين گنڊاپور جي اڳتي نه اچڻ جي ڪري ڪاوڙ جو ماحول پيدا ٿيو. پي ٽي آءِ اڳواڻ شوڪت يوسفزئي موجب قافلي ۾ هڪ موقعي تي جڏهن سخت شيلنگ جي ڪري ڪجهه وزير پوئتي هٽڻ لڳا ته ڪارڪنن کين اڳتي ڌڪيو. هن وقت به فرنٽ تي ڪارڪن ئي سرگرم آهن. شيلنگ کان بچڻ لاءِ ڪجهه احتجاجي ڪارڪنن وٽ لوڻ جون ٿيلهيون ۽ ڪجهه وٽ پاڻي جون بوتلون آهن. ٻئي پاسي ڪجهه ماڻهو گاهه کي باهه ڏئي ڳوڙها آڻيندڙ گيس جا اثر ختم ڪرڻ جي ڪوشش ڪن ٿا. هزارا مان عمر ايوب جي قافلي جي انتظار جي ڪري علي امين گنڊاپور جي قافلي جي رفتار سست رکي وئي. قافلي ۾ موجود نوجوان موجب هزارين پوليس اهلڪار موجود آهن ۽ ڪارڪنن جون ڊرون ڪيمرا ذريعي تصويرون وٺي رهيا آهن، هن وقت تائين ڪا گرفتاري ناهي ٿي پر چڪرين ۽ شيلنگ دوران پوليس جا 2 اهلڪار احتجاجي ڪارڪنن پڪڙي ورتا هئا جن مان هڪ جان ڇڏائڻ لاءِ ڍنڍ ۾ ٽپو ڏنو هو. پي ٽي آءِ اڳواڻ شوڪت يوسفزئي موجب، جيڪڏهن پي ٽي آءِ جي احتجاج ۾ گهڻا ماڻهو شامل نه آهن ته پوءِ حڪومت سڄو پاڪستان ڇو بند ڪيو آهي؟ طاقت جي زور تي پي ٽي آءِ کي دٻائڻ ممڪن ناهي. حڪومت طرفان اڃا تائين ڪو رابطو ناهي ٿيو. هوڏانهن پنجاب جي ڪجهه علائقن ۾ ڪجهه دير لاءِ رنڊڪون هٽايون ويون جيڪي ٻيهر لڳايون ويون. اسلاميه يونيورسٽي ۽ پنجاب يونيورسٽي ۾ امتحان ملتوي ڪيا ويا. موٽروي جا ڪيترائي سيڪشن ٽريفڪ لاءِ بند رهيا، جنرل بس اسٽينڊ، بادامي باغ ۽ بند روڊ جا اڏا به نه کليا. پنجاب ۾ احتجاج ڪندڙ ڪارڪنن جي گرفتارين جو سلسلو جاري رهيو. صوبي ۾ انٽرنيٽ سست ڪئي وئي ۽ موبائيل ڊيٽا معطل ڪئي وئي. وفاقي وزير خواجا آصف چيو ته اسلام آباد ايندڙ پي ٽي آءِ جي قافلي مان حڪومت کي ڪا پريشاني ناهي، علي امين گنڊاپور جهڙن ماڻهن جي ڪا ساک ناهي.
