ڪراچي (رپورٽر) ڪراچي جي سامونڊي علائقي هاڪس بي تي سمنڊ ۾ ٻن عورتن سميت 8 ڄڻا ٻڏي ويا، جن مان چئن ڄڻن کي بچايو ويو آهي، واقعي جو اطلاع ملندي ئي لائف گارڊز ۽ ريسڪيو اهلڪار مدد لاءِ پهچي ويا ۽ پنجن ڄڻن کي بيهوشي جي حالت ۾ سمنڊ مان ڪڍيو ويو. پوليس موجب ٻڏي فوت ٿيل مرد کي اسپتال نيو ويو ته هو رستي ۾ ئي فوت ٿي ويو، جڏهن ته ٻڏي ويل عورتن کي اسپتال منتقل ڪيو ويو جتي هڪ عورت پڻ فوت ٿي وئي. متاثر خاندان لياقت آباد نمبر 3 گجر نالي جا رهواسي آهن، فوتين جي سڃاڻپ 30 سالن جي نورين زال شيرا ۽ 40 ورهين جو ارشد پٽ بشير ۽ 40 سالن جي اسما زال ڪريم بخش طور ٿي آهي. ٻئي طرف سي وي ويو وٽ ٽي دوست سمنڊ ۾ ويهنجي رهيا هئا، جن مان دانش نالي نوجوان ٻڏي فوت ٿي ويو. ٻڏي فوت ٿيل نوجوان سلطان آباد جو رهواسي هو. هوڏانهن ايڊيشنل آءِ جي ڪراچي جاويد عالم اوڍو ٽرٽل بيچ هاڪس بي سمنڊ ۾ 4ڄڻن جي ٻڏڻ جو سخت نوٽيس وٺندي لاپرواهي ۽ غفلت تي لاڳاپيل ايس ايڇ او خلاف ڪارروائي جو حڪم ڏئي ڇڏيو. ترجمان ڪراچي پوليس موجب سمنڊ ۾ وهنجڻ تي قلم 144 جي ڀڃڪڙي ڪندڙن خلاف سخت قانوني ڪارروائي ڪئي وڃي. سي ويو، منوڙي ۽ هاڪس بي ۾ ڪنهن به شخص جي ٻڏڻ جي صورت ۾ لاڳاپيل ايس ايڇ او/ ڊي ايس پي خلاف سخت قانوني ڪارروائي پڻ ڪئي ويندي.
