رپورٽون آهن ته سنڌ سارڪار سنڌ هاءِ ڪورٽ جي ڪارونجهر جبل کي ورثو قرار ڏيڻ واري فيصلي کي سپريم ڪورٽ ۾ چيلينج ڪري ڇڏيو آهي. ياد رهي ته 7 مئي 2024 تي سنڌ هاءِ ڪورٽ ثقافت کاتي کي حڪم ڏنو هو ته ڪارونجهر کي ورثو قرار ڏئي ڪري ان نوٽيفيڪيشن کي ڪورٽ ۾ پيش ڪيو وڃي پر رپورٽن موجب سنڌ سرڪار نوٽيفيڪيشن ڪڍڻ بدران ان معاملي کي سپريم ڪورٽ ۾ چيلينج ڪري ڇڏيو آهي.
اهڙو انڪشاف ڪارونجهر ڪيس جي وڪيل شنڪر لال عوامي آواز سان ڳالهائيندي ڪيو آهي هن ٻڌايو آهي ته 16 آڪٽوبر 2023 تي سنڌ هاءِ ڪورٽ حيدرآباد بينچ ڪارونجهر رينج کي هيريٽيج ڊڪليئر ڪيو هو ۽ وڌيڪ حڪم ڏيندي چيو هو ته ڪارونجهر جي وڻڪاري مهم هلائي ان جي اصل خوبصورتي بحال ڪئي وڃي ۽ هر ٽه ماهي رپورٽ عدالت ۾ پيش ڪئي وڃي واري حڪم تي عمل درآمد لاءِ منهنجي درخواستن تي سنڌ هاءِ ڪورٽ 7 مئي تي ڪارونجهر کي ورثو قرار ڏيڻ وارو نوٽيفيڪيشن ڪڍڻ جو حڪم ڏنو هو. شنڪرلال اهو به ٻڌايو ته هڪ ڏينهن اڳ مون کي سپريم ڪورٽ پاران نوٽيس پڻ وصول ٿيو آهي.
اسان کي اهو بلڪل به سمجهه ۾ نه ٿو اچي ته جڏهن سنڌ جو عوام ، ٿر واسي، سنڌ جون قوم پرست جماعتون، سنڌي پرنٽ توڙي اليڪٽرانڪ ميڊيا، سنڌ جا دانشور، اديب، شاعر ۽ سنڌ هاءِ ڪورٽ مطلب ته سڀ جا سڀ ڪارونجهر جبل جي ڪٽائي جي خلاف آهن ۽ اهي سڀ ڪارونجهر جبل کي سنڌ جو تمام وڏو سياحتي ورثو قرار ڏئي رهيا آهن ته پوءِ سنڌ حڪومت ان جي ڪٽائي تي ڇو بضد آهي.ڇا اهو رويو ڪنهن به عوامي ۽ جمهوري جماعت جي دعويدار حڪومت کي سونهين ٿو؟. سنڌ سرڪار ڀلي اهو سمجهندي هجي ته ڪارونجهر جبل جي ڪٽائي مان ڪمائڻ جي ضرورت آهي. پر جڏهن سنڌ جو عوام اڪثريتي طور تي ڪارونجهر جي ڪٽائي جي اجازت نه ٿو ڏئي ته جمهوري راءِ جي تقاضا آهي ته حڪومت اهڙي منصوبي تان هٿ کڻي.
سنڌ حڪومت کي ان غلط فهمي مان نڪرڻ گهرجي ته ڪو چونڊن ۾ کٽڻ جي معنيٰ اها آهي ته اوهان پاڻ مرادو عوام جي مخالفت هوندي سنڌ جي تڪراري منصوبن تي ڪم ڪندئو. ٻيو ته اوهان چونڊ مهم ۾ يا پنهنجي منشور ۾ ڪٿي ٻڌايو يا لکيو هو ته اقتدار ۾ اچي ڪري اسان ڪارونجهر جبل کي ڪوري ان مان ڪمائڻ جا منصوبا جوڙينداسين. اسان کي سمجهه ۾ نٿو اچي ته سنڌ حڪومت ڪنهن جي چوڻ تي ان منصوبي تي هلي رهي آهي ۽ ان معاملي تي ايڏو بضد ٿي وئي آهي جو سنڌ هاءِ ڪورٽ جي منع ڪرڻ باوجود سپريم ڪورٽ ۾ ان عدالتي فيصلي کي چيلينج ڪيو آهي.؟
اسان پهريون به سنڌ حڪومت کي ان ايديٽوريل ۾ تجويز ڏني هئي ته اهڙن حساس ۽ تڪراري معاملن تي هميشه سنڌ جي ٿنڪ ٽينڪ ۽ اسٽيڪ هولڊرز سان ڪانفرنس گهرائي لازمي طور تي اين او سي وٺي. ائين سنڌ حڪومت نه رڳو تڪراري فيصلن کان بچي ويندي پر پنهنجي جوهر ۾ عوامي حڪومت هئڻ جو تاثر قائم ڪندي ۽ پوءِ سندس مخالف به اهو مڃڻ تي مجبور ٿيندا ته پ پ واحد حڪمران جماعت آهي جيڪا عوام کي اعتماد ۾ وٺي فيصلا ڪري ٿي پر افسوس ته سنڌ ۾ سڀ کان گهڻي حڪومت ڪرڻ باوجود پ پ سنڌي عوام جي هر دلعزيز پارٽي يا حڪومت نه بڻجي سگهي آهي. پ پ حڪومت سنڌي عوام جي هر دلعزيز پارٽي تڏهن بڻجندي جڏهن هو سنڌي عوامي کي کي اعتماد ۾ وٺي ڪري فيصلا ڪندي. ان جي شروعات سنڌ حڪومت جيڪڏهن ڪارونجهر جبل تي اعتماد وٺڻ سان ڪري ته ان جي آجيان ڪئي ويندي. ان کان اڳ ۾ پ پ سنڌي عوام جي شديد مخالفت ڪري ڪالاباغ ڊيم جي منصوبي تان هٿ کڻي ڏيکاريو آهي پر جيڪڏهن پ پ ڪالا باغ ڊيم تي ائين ئي بضد هجي ها ته يقينن اها حڪومت ۾ نه هجي ها ۽ سنڌي عوام ان کي مڪمل طور تي رد ڪري چُڪي هجي هان. ڪالا باغ ڊيم وانگر ڪاروجهر جبل جي ڪٽائي وارو معاملو به سنڌي عوام لاءِ جذباتي مسئلو بڻجي ويو آهي. اهو ڪارونجهر جي ڪٽائي کي سنڌ جي سياحتي ورثي تي وار سمجهي ٿو
سنڌ حڪومت به ان معاملي ۾ ٻٽو ڪردار ادا ڪري رهي آهي. هڪ پاسي اها ٿي چوي ته ڪارونجهر جبل جي سياحتي سونهنکي متاثر نه ڪبو ۽ ٻئي پاسي لڪ ڇپ ۾ اها ان جي ڪٽائي به ڪندي رهي آهي ۽ جڏهن اهڙيون خبرون رپورٽ ٿينديون آهن ته ڪجهه وقت لاءِ عوام جي ڪاوڙ کي ٿڌو ڪرڻ لاءِ ڪم بند ڪرائيندي آهي ۽ پوءِ وري ڳجهه ڳولو ۾ ڪٽائي ڪرائيندي به رهندي آهي. ايئن هاڻي به اسان کي دلجاءِ ٿي هئي ته سنڌ هاءِ ڪورٽ ڪارونجهر جبل کي ورثو قرار ڏيڻ جو حڪومت کي نوٽيفيڪيشن ڪڍڻ جو حڪم ڏنو آهي ته جلدسنڌ حڪومت جو نوٽيفيڪيشن ايندو پر ڪارونجهر جبل ڪيس جي وڪيل جيڪو انڪشاف ڪيو آهي تنهن ته اکيون ئي کولي ڇڏيو آهن. سنڌ حڪومت کي ڪارونجهر جبل جو ڪيس ان سپريم ڪورٽ ۾ بلڪل به نه نيئڻ گهرجي جنهن جي حيثيت خاص ڪري موجوده دور ۾ ساکائتي به نه سمجهي وڃي.
سو سنڌ حڪومت، سنڌي عوام ۽ ڪارونجهر جبل جي مفاد ۾ اهو ئي آهي ته سنڌ هاءِ ڪورٽ جي فيصلي تي عمل ڪيو وڃي ۽ ان کي چيلينج ڪرڻ کان پاسو ڪيو وڃي. چوندا آهن اهو سون ئي گهوريو جيڪو ڪن ڇني. سو سنڌ حڪومت کي به اهو سمجهڻو پوندو ته اها ڪنهن اهڙي سون جهڙي منصوبي ۾ هٿ نه وجهي جيڪا سندس يسر کڻي. پ پ حڪومت اسٽيبلشمنٽ جي مفادن کي ڏسڻ بدران پاڻ کي تاريخ ۾ سرخرو ٿيڻ جو سوچڻ گهرجي ۽ تاريخ ۾ سرخرو تڏهن ئي ٿيبو آ جڏهن سنڌي عوام جي مفاد ۾ فيصلا ڪبا. سو سنڌي عوام، پ پ حڪومت ۽ ڪارونجهر جبل جي مفاد ۾ اهو ئي آهي ته سنڌ حڪومت سنڌ هاءِ ڪورٽ جي فيصلي جو احترام ڪندي ان تي عمل ڪري
