دنيا ڏسندي پئي اچي، ملڪي تاريخ پڻ شاهد آهي، ملڪ ٺهڻ کان وٺي ۽ اڄ تائين، ملڪ ۾ ڇا ڇا ٿيندو رهيو!؟ڇا ٿي رهيو آهي!؟ ۽ ايندڙ وقتن ۾ ڇا ٿيندو!؟ سالن کان هلندڙ حالتن جي تسلسل کي ڏسندي اِهوئي پيو محسوس ٿئي، ايندڙ وقتن ۾ پڻ اهڙيون. حالتون رهنديون، جيڪي حالتون ملڪ ٺهڻ واري ڏينهن کان جيئن جو تيئن هلنديون رهن ٿيون. چاليهه سالن جو منهنجو صحافتي تجربو ۽ تجزيو ٻڌائي ٿو ته ملڪ جي سياسي پارٽي پي ٽي آءِ ، جو سربراهه عمران خان نيازي، جيڪڏهن اڃان پنهنجي هٺ، هوڏ تي بضد رهي، ڏاڍ جي گهوڙي تي سوار ٿي، پنهنجون ناڪاره سياسي سوچون کڻي اڳتي وڌندو رهيو ته ان صورت ۾ پنهنجو به سڀ ڪجهه وڃائي ويهندو ۽ ملڪ جون حالتون اڃان به انتهائي خطرناڪ صورت اختيار ڪري سگهن ٿيون، اسان جو ملڪ پيارو پاڪستان (خدا خير ڪري) ڪنهن حادثي جو شڪار به ٿي سگهي ٿو!؟
ڏسو! ملڪ سان ڪيڏو ناحق ٿي رهيو آهي! وفاقي ۽ صوبائي ادارا ملڪ ۽ صوبن جي سَاهَه جُون رڳون آهن، جن جي ترقي ۽ مضبوط هجڻ سان ملڪ ۽ صوبا ساهه کڻي رهيا آهن. پر افسوس! ڪامورا شاهي جو “ڪرپشن” ملڪ جي وجود لاءِ ڪينسر جو رُوڳُ بڻجي چڪو آهي. ملڪ جي رڳن ۾ “ڪرپشن” جو زهر ڊوڙي پيو، رڳون تيزيءَ سان سُڪڙجي مرڻ ڏانهن وڃي رهيون آهن، اڃان اهڙو ڪو ڊاڪٽر ئي پيدا ٿيو ناهي، جيڪو پنهنجي ملڪ ۽ قوم تي رحم کائي، “ڪرپشن” جي خطرناڪ مرض کان ملڪ بچائي. ملڪ جي وجود جي بقاجي ضمانت ڏيندڙ ملڪي ادارن کي هلائيندڙ ڪامورا سرعام دليري سان اربين روپين جي ڪرپشن ڪري وڏيون جائيدادون، وڏا محل ماڙيون، ملڪيتون ۽ اربين روپيا بئنڪن ۾ رکيون ويٺا آهن. سڀ خبر هوندي به انصاف جي اکين تي پٽيون ٻڌل آهن. ڪامورن کان ڪوته پڇا ڪري اوهان وٽ اربين ڪيئن گڏ ٿي ويا آهن!؟
اَمن اِمان جو مسئلو به ملڪ لاءِ هميشه وڏو مسئلو رهيو آهي. اَمن امان نه هجڻ، غير يقينيءَ واريون حالتون پيدا ٿيڻ سان ترقيءَ جا رستا بند ٿي ويندا آهن، پيداواري رُجهان گهٽجي وڃڻ سان ملڪ خساري ۾ هليو ويندو آهي. اهڙن سڀني مسئلن جو جنم وٺڻ ۽ حل نه ٿيڻ جو سڀ کان وڏو سبب آهي، ملڪ ۾ برابري جي بنياد تي انصاف نه ٿيڻ. اسان جي ملڪ ۾ هاڻ ته، انصاف جا ماپ، ماڻ به پنهنجا پنهنجا ٿي پيا آهن. نتيجي ۾ يتيم ٿي ويل اسان جو پيارو ملڪ پاڪستان ۽ اسين غريب عوام ڳاٽي ٽوڙ مهانگائي بيروزگاري، بک، بدحالي ۾ اذيتناڪ درد ڀوڳي رهيا آهيون ۽ انصاف جي اکين تي اڃان پٽيون ٻڌل آهن. هن ملڪ ۾ هڪڙن جي ڳچين مان گوليون آرپار ڪري سوراخ ٺاهيا ويا ۽ هڪڙن جي ڳچين ۾ گلن جا هار پارائي شابشون ڏنيون ويون. دنيا وارا اهڙا لقاءُ ڏسندا رهيا ۽ اڄ به ڏسي رهيا آهن. هڪڙن کي پرائو سمجهي بيگناهه سوليءَ جو سينگار بڻايو ويو ۽ پنهنجن گنهگارن کي عدالت ۾ کيڪاري آڌرڀاءُ ڪيو وڃي ٿو، ملڪ جي اعليٰ انصاف گهرن مان به “پنهنجو ۽ پرائو” جي بنياد تي ٿيندڙ فيصلا ملڪ ۽ عوام لاءِ ڳڻتي جوڳا عمل ٿي پيا آهن.
ملڪ جي سڀ کان وڏي عوامي پارٽي پاڪستان پيپلز پارٽي سان تاريخ جا سڀ کان وڏا قهر ڪيا ويا، پارٽي جي عظيم رهنما شهيد ذوالفقار علي ڀٽو صاحب پاڪستان کي ائٽمي طاقت ڏني، ان عظيم عوامي رهنما رهبر کي اعليٰ عدالتن جي جج صاحبن گڏجي بيگناهه ڦاسي ڏيئي شهيد ڪيو، ۽ انصاف جي اکين تي پٽيون ٻڌل هيون. ايم آر ڊي تحريڪ دوران پُراَمُن احتجاج ڪرڻ کي به ڏوهه سمجهي سنڌ مٿان قيامتون برپا ڪيون ويون. سنڌين کي بيدرديءَ سان ڪٺو ويو! مير مرتضيٰ ڀٽو کي ساٿين سميت پنهنجي ئي گهر جي سامهون گولين جو مينهن وسائي شهيد ڪيو ويو!! ڪار ساز ٿي سنڌ جو رت هيو سنڌ جي راڻي محترما بينظير ڀٽو کي راولپنڊي ۾ دهشتگردن جي هٿان شهيد ڪرايو ويو!!تڏهن به انصاف جي اکين تي پٽيون ٻڌل هيون!
نه ڄاڻ “پنهنجو ۽ پرائو” وارو فرق اسان جي پياري ملڪ پاڪستان ۽ عوام لاءِ اڃان الائجي ڪيترو خطرناڪ ٿيندو!!؟ ملڪ ۽ عوام کي تباهيءَ جي رڻ ۾ رولي ڇڏيندڙ عمران خان نيازي لاءِ انصاف جي اکين تان پٽيون لهي ويون آهن. سڀني کي پيارو آهي، ڇو ته پنهنجون آهي لاڏلو آهي، ڀل ملڪ ۽ عوام کي برباد ڪري ڇڏي پرواهه ناهي، پوءِ به پنهنجو آهي لاڏلو آهي. چاچن، مامن جي ڪلهن تي چڙهي وڃي وزيراعظم جي ڪرسيءَ تي ويهندڙ لاڏلو خان جڏهن اڃان چاچن مامن جي سياسي ترتيب هيٺ هيو، تڏهن ڦڙڪائي ڏسڻ لاءِ سال 2014ع ۾ ميان محمّد نواز شريف جي حڪومت خلاف سياسي ميدان ۾ لاٿو ويو هو.
ملڪ جي آزاديءَ واري ڏينهن کان “نئون پاڪستان” ٺاهڻ لاءِ پنجاب کان عمران خان نيازي ۽ طاهرالقادري صاحب “انقلاب ۽ آزادي” مارچ جي نالي تي ماڻهن جو ميڙ وٺي اسلام آباد جي مک روڊ تي پهتا ريڊ زون ۾ خيما کوڙي ويهي رهيا ، وزيراعظم ميان محمّد نواز شريف جي استعيفيٰ ڏيڻ کان سواءِ ڌرڻو ختم ڪرڻ لاءِ تيار ئي نه هئا.چئن مهينن تائين ڌرڻو هڻي ويهي رهيا. ملڪ جي گاديءَ واري شهر تي ڪاهه ڪري قائداعظم جي پاڪستان بدران نئين پاڪستان ٺاهڻ لاءِ کلي عام بغاوت جا نعرا هڻي الم اُڀا ڪيا ويا هئا، سول نافرمانيءَ جا اعلان ٿيا، ٽيڪس سوڌو بجلي ۽ گئس جا بل نه ڏيڻ جا نادري حڪم ڌرڻي واري اسٽيج تان جاري ٿيندا رهيا ۽ پوءِ اڃان به اڳتي وڌي ملڪ جي احساس ادارن جو گهيرو ڪيو ويو هو، پي ٽي وي ۽ پارليامينٽ ۾ داخل ٿي اُتي جي ملازمن کي حراسان ڪيو ويو هو.
عمران خان نيازي ۽ طاهرالقادري جي گڏيل ڌرڻي سان ملڪ ۾ غير يقينيءَ واري صورتحال پيدا ٿي پئي هئي، ملڪ کي ابين روپين جو نقصان ٿيو هو، ملڪي معيشت جو ڍانچو تباهه ٿي چڪو هو ۽ رهي سهي ڪسر ٻوڏ پوري ڪري ڇڏي هئي. ۽ پوءِ سندس ئي چاچن، مامن گلن جا هار پارائي حڪم ڪيو “هاڻ هليا وڃو” هي همراهه ڌرڻو ختم ڪري هليا ويا، ۽ قانون جي اکين تي پٽيون ٻڌل هيون!
سال 2018ع جي عام چونڊن ۾ بُري طرح شڪست ملڻ جي باوجود به آازاد ميمبرن کي پڪڙي گڏ ڪري پنهنجي لاڏلي کي زبردستي حڪومتي واڳ هٿن ۾ ڏني وئي، لاڏلو اچي ڪاري جو مالڪ ٿي شهنشاهه بڻيو ويٺو رهيو، ۽ پوءِ جڏهن سندس ئي چاچن، مامن کي اها سُڌ پئي ته “اسان جهوليءَ ۾ نانگ نپائي رهيا آهيون هي ته “اسان سميت ملڪ کي به ڏنگي وجهڻ جون تياريون پيو ڪري” ايئن ئي پاڪستان دشمن سامراجي قوتن سان ٿيل ڳٺ جوڙ جون پڪيون ثابتيون ملڻ کان پوءِ حڪومتي واڳ کسي بني گالا جو رستو ڏيکاريو ويو. بني گالا پهچي ملڪ ۽ قوم جي ڀلي خاطر پنهنجون غلطيون سڀ ڪوتاهيون تسليم ڪري نئين سر سياست جو عوامي رستو اختيار ڪري، سياسي ميدان ۾ اڳتي وڌڻ بدران هن جنگ ڪرڻ جو رستو اختيار ڪيو ۽ پوءِ دنيا وارن ڏٺو ته، 9 مئي 2023ع تي عمران خان نيازي ملڪ ۽ عوام سان بغاوت ڪري وڌي، پنهنجي ٽائيگر دهشتگرد گروهه کي ميدان ۾ لاٿو ۽ جنگ شروع ٿي، پاڪ فوج خلاف جنگ جا طبل وڄندا رهيا، اهم ادارن تي حملا ٿيندا رهيا. پر! پاڪ فوج پنهنجي قابليت ۽ ڏاهپ سان پاڪ فوج جي جوانن ۽ سڀني ادارن کي جوابي ڪاروائي نه ڪرڻ جو حڪم ڏنو، پُر امن رهڻ لاءِ چيو ويو، اهڙيءَ ريت 9 مئي جي خوبي بغاوت کي ناڪام بڻايو ويو. هن وقت ڪي پي ڪي ۾ بغاوت جا اُڀا ٿيندڙ جهنڊا عمران خان نيازي جي ملڪ دشمني واري ڪردار کي وائکو ڪن پيا. دنيا حيران آهي ته، جيڪو شخص پاڪستان دشمن عالمي سامراج قوتن جو مُک مُهرو بڻجي ڊالرن جي عيوض پنهنجي ئي ملڪ خلاف بغاوتن جا جهنڊا کڻي ميدان ۾ نڪري نروار ٿي بيٺو آهي. ان مقصد لاءِ سامراجي قوتن کان وڏا فنڊ ملڻ جون پڪيون ثابتون به مليون آهن. موجوده پاڪ فوج جي پوري قيادت سان ويڙهه ڪرڻ جون سرعام ڌمڪيون ڏيئي رهيو آهي. مچايل اهڙي افرا تفري واري ماحول ۾ ملڪ جو سياسي، سماجي ۽ معاشي ڍانچو مڪمل تباهه ٿي چڪو آهي ۽ اڃان به حالتون خطرناڪ ٿي رهيون آهن، اهڙين حالتن هوندي به انصاف گهرن ۾ ويٺل ڪجهه صاحبن جو لاڏلو بڻيل آهي. ڇو ته پنهنجو آهي.
اسان جي ملڪ ۾ سياسي قدر پائمال ٿي چڪا آهن. ادارا تباهه آهن، عوام انصاف جي گهرن ڏانهن سٺائيءُ جي اُميد رکيون ويٺا آهن.انصاف جي گهرن مان به مايو سيون نصيب ٿين ته “پنهنجو ۽ پرائو” جي بنياد تي فيصلا صادر ٿين. ته اسان جي پياري ملڪ پاڪستان ۽ پاڪستان جي 24 ڪروڙ 14 لک 90 هزار غريب عوام جو ڇا ٿيندو!!؟؟ اسان هٿ ٻڌي سڀني کي عرض ڪريون ٿا، ته پنهنجي ۽ پنهنجي ايندڙ نسلن جي سُکي زندگي لاءِ خدارا! پنهنجي ملڪ ۽ عوام تي ڪجهه رحم ڪريو!!
