ڪراچي(پ ر) ڪراچي (پ ر) ڪائونسل آف پاڪستان نيوز پيپر ايڊيٽرز (سي پي اين اي) جي هڪ وفد سينيئر نائب صدر انور ساجدي جي سربراهي ۾ سڌ سماءَ واري وفاقي وزير عطاءُ الله تارڙ سان ملاقات ڪئي، ان موقعي تي انور ساجدي چيو ته سڄي ملڪ ۾ خاص ڪري بلوچستان ۾ دهشتگردي جو سلسلو جاري آهي. پريس جي آزادي ۽ اظهار راءِ جي آزادي تي پابندي، جنهن تي سي پي اين اي کي سخت تحفظات آهن، نئين چونڊيل حڪومت کي ان جو نوٽيس وٺڻ گهرجي، سيڪريٽري جنرل اعجاز الحق چيو آهي ته ميڊيا رياست جو چوٿون اهم ٿنڀ آهي، جيڪو جمهوريت جي استحڪام ۽ اقتصادي ترقي لاء پنهنجو ذميواراڻو ڪردار ادا ڪري رهيو آهي. عطاءُ الله تارڙ چيو ته وزيراعظم شهباز شريف جي حڪومت ملڪ جي معاشي صورتحال کي بهتر بڻائڻ لاءِ ڪوششون ڪري رهي آهي ۽ ان حوالي سان هر ممڪن قدم کنيا پيا وڃن. هن چيو ته هو اخبارن ۽ اليڪٽرانڪ ميڊيا جي اهميت کي سمجهن ٿا. انھن کي وڌيڪ مضبوط ڪرڻ چاھيو ٿا. سڌ سماءَ واري وفاقي وزير چيو ته حڪومت صحافت جي آزادي ۽ اظهار جي آزادي کي تسليم ڪري ٿي ۽ ان تي پابندي لڳائڻ جو ڪو به ارادو ناهي پر سوشل ميڊيا تي بدانتظامي جي طوفان سماجي اخلاقيات کي تباهه ڪري ڇڏيو آهي. ان سلسلي ۾ ڪجهه اصول ۽ ضابطا ٺاهڻ جي ضرورت آهي. جنهن تي صحافتي تنظيمن سان به مشاورت ڪئي ويندي. وفاقي وزير وڌيڪ چيو ته ميڊيا 1.6 ارب رهتن جي فوري ادائيگي ڪري رهيا آهيون. اڳوڻي وزيراعظم شهباز شريف جي حڪومت پاران اخبارن ۾ اشتهارن جي قيمتن ۾ 35 سيڪڙو واڌ جو نوٽيفڪيشن جلد جاري ڪيو ويندو. سڌ سماءَ واري وفاقي وزير چيو ته حڪومت پي آءِ اي جي نجڪاري جو عمل ترجيحي بنيادن تي ڪري رهي آهي، پي آءِ اي جي نجڪاري جو عمل جلد مڪمل ڪيو ويندو. سڌ سماءَ واري وفاقي وزير کي اخبارن جي مسئلن کان آگاهه ڪندي ٻڌايو ويو ته علائقائي اخبارن خاص ڪري سنڌي اخبارن کي مسلسل نظرانداز ڪيو پيو وڃي ۽ نگران حڪومت جي دور ۾ اخبارن ۽ رسالن کي مڪمل طور تي نظرانداز ڪري معاشي طور تباهه ڪرڻ جي ڪوشش ڪئي وئي. سي پي اين اي جي وفد سان گڏ سينيئر نائب صدر انور ساجدي، سيڪريٽري جنرل سي پي اين اي اعجازالحق، نائب صدر عامر محمود ۽ عارف بلوچ، فنانس سيڪريٽري غلام نبي چانڊيو، جوائنٽ سيڪريٽري مقصود يوسفي، سينيئر ميمبر ڊاڪٽر جبار خٽڪ، قاضي اسد، عابد، سعيد خاور ۽ ٻيا شامل هئا. عورت ميمبر منزا سهام پڻ موجود هئي.
