اسلام آباد( م ڊ) سينيٽ جي رٽائرڊ ميمبرن الوداعي اجلاس ۾ پنهنجي خواهشن جو اظهار ڪيو، ڪنهن چيو ته جيڪڏهن وزيراعظم کي هڪ ڏينهن جي وزارت عظميٰ ملي ته هو پارليامينٽ جي ميمبرن کي مفت جهاز جون ٽڪيٽون بند ڪري ڇڏيندا ۽ ڪنهن کي به مفت بجلي نه ملندي. مفت پيٽرول ۽ ڪنهن چيو ته نگران حڪومت جو نظام ختم ڪيو وڃي.سينيٽ جو اجلاس ڊپٽي چيئرمين مرزا آفريدي جي صدارت هيٺ پارليامينٽ هائوس اسلام آباد ۾ ٿيو، جنهن ۾ سروس ٽربيونل ايڪٽ 1973 جي ترميمي بل تي قائم ڪيل ڪميٽي قانون ۽ انصاف جي رپورٽ پيش ڪئي، ان کان علاوه سمنڊ پار پاڪستانين کي پيش ايندڙ مسئلن بابت قائم ڪميٽي جي رپورٽ به ايوان ۾ پيش ڪئي وئي ، سينيٽ اجلاس کي خطاب ڪندي سينيٽر مشاهد حسين سيد چيو ته واپارين جو چوڻ آهي ته هڪ وقت ۾ پاڪ افغان واپار 5 ارب ڊالرن جو هو، جيڪو بارڊر تي رڪاوٽن سبب سخت متاثر ٿيو آهي، ڪابل کان واپاري سخت پريشان آهن. پراڻي طريقي سان پاڪ-افغان واپار کي جاري رکڻ گهرجي. سينيٽر مشاهد حسين سيد چيو ته اسان جا ٽن پاڙيسري ملڪن سان لاڳاپا سٺا نه آهن، پاڪ افغان واپار جي راهه ۾ رڪاوٽون ختم ڪيون وڃن، افغانستان ۽ ايران سان واپار وڌائڻ گهرجي. مسلم ليگ (ن) جي سينيٽر سعديه عباسي اعتراض جو اظهار ڪندي چيو ته نئين اسيمبلي اچي وئي آهي، اسان ان کان مطالبو ڪريون ٿا ته آئين ۾ موجود خاميون دور ڪيون وڃن، سڄي دنيا ۾ حڪومتون اينديون ۽ وينديون آهن، سمورا پارليامينٽيرين جمهوريت جي بهتري لاءِ ڪم ڪن. سينيٽر عرفان صديقي چيو آهي ته نگران حڪومتن جي نظام کي ختم ڪيو وڃي، سينيٽر عرفان صديقي چيو ته پاڪستان واحد ملڪ آهي جتي اڄ به نگران حڪومتون آهن، ڪيترن ئي ملڪن ۾ نگران حڪومتن جو نظام ختم ٿي چڪو آهي، صوبن ۾ نگرانن 13-13 مهينا ۽ وفاق ۾ 7-7 مهينا حڪومت ڪئي آهي.
