اسلام آباد(م ڊ) سپريم ڪورٽ اڳوڻي وزيراعظم ذوالفقار علي ڀٽو جي ڦاهي خلاف صدارتي ريفرنس جي ٻڌڻي ڪئي،ٻڌڻي دوران چيف جسٽس قاضي فائز عيسيٰ چيو آهي ته سپريم ڪورٽ ذميوار آهي يا ان وقت جو مارشل لا ايڊمنسٽريٽر؟ سپريم ڪورٽ ۾ ڀٽو ريفرنس ڪيس جي ٻڌڻي ڪئي. چيف جسٽس آف پاڪستان جسٽس قاضي فائز عيسيٰ جي سربراهي ۾ جسٽس سردار طارق مسعود، جسٽس سيد منصور علي شاهه، جسٽس يحيٰ آفريدي، جسٽس امين الدين خان، جسٽس جمال خان مندوخيل، جسٽس محمد علي مظهر، جسٽس سيد حسن اظهر رضوي ۽ جسٽس مسرت هلالي تي ٻڌل ٻڌڻي ڪئي. سپريم ڪورٽ جي 9 رڪني لارجر بينچ ريفرنس جي ٻڌڻي ڪئي. ان دوران وڪيل خواجا حارث چيو ته منهنجو والد ڀٽو ڪيس ۾ ڊي جي ايف ايس ايف مسعود محمود جو وڪيل هو، اهو سڀ مڃين ٿا، رضارباني خواجا حارث جي عدالتي مددگار تي اعتراض اٿاريو، خواجا حارث پاڻ کي عدالتي مددگار بڻائي ڪيس کان الڳ ڪري ورتو. بعد ۾ مخدوم علي خان سيد شريف الدين پيرزادي جو خط پڙهي ٻڌايو، هن چيو ته ذوالفقار علي ڀٽي جي ڀيڻ صدر وٽ رحم جي اپيل داخل ڪئي هئي، ذوالفقار علي ڀٽو پاڻ رحم جي اپيل داخل نه ڪئي هئي، ذوالفقار علي ڀٽو کي هڪ جي تناسب سان موت جي سزا ٻڌائي وئي هئي. 4 – 3، هڪ جج بعد ۾ هڪ انٽرويو ۾ چيو ته مون کي فيصلي لاءِ مجبور ڪيو ويو. مخدوم علي خان دليل ڏيندي چيو ته عدالت آڏو سوال ڀٽو جي ڦاهي جو ناهي، ذوالفقار علي ڀٽي جي ڦاهي ريورس ( واپس) نه ٿي ٿي سگهي. عدالت آڏو معاملو ان داغ جو آهي. بينچ ۾ شامل جسٽس محمد علي مظهر پڇاڻو ڪيو ته جيڪڏهن عدالت ان ڪيس ۾ ڪجهه ڪري ته ڇا هر ڪيس ۾ ڪرڻو پوندو؟ وڪيل مخدوم علي خان جواب ڏنو ته ان ريفرنس جو بنياد جسٽس نسيم حسن شاهه جو انٽرويو هو. جسٽس منصور علي شاهه چيو ته ڳالهه رڳو اها آهي ته ان وقت عدليه آزاد نه هئي، اسان اهو ڪيئن ٿا سمجهون ته بينچ آزاد نه هئي؟ جسٽس يحيٰ آفريدي چيو ته هڪ جج جي انٽرويو سان پوري عدالت جو تاثر نٿو ڏئي سگهجي ته پوءِ عدليه آزاد ناهي؟ ٻيا جج به هئا جن پنهنجا نوٽس لکيا ۽ اختلاف به ڪيا، چيف جسٽس پڇاڻو ڪيو ته ان ڪيس ۾ هڪ جج جي راءِ کي نظرانداز نه ٿو ڪري سگهجي، ڀٽو ڪيس ۾ بينچ جو تناسب اهڙو هو جو هڪ جج جي راءِ به اهم آهي، ان ڪيس ۾ هڪ شخص کي جج جي اڪثريت جي ووٽ جو تناسب سان موت جي سزا ڏني وئي.
