ڪراچي (رپورٽر) سپريم ڪورٽ ڪراچي رجسٽري ۾ جسٽس محمد علي مظهر، جسٽس حسن اظهر رضوي ۽ جسٽس عقيل احمد عباسي تي ٻڌل بئنچ انساني حقن جي کاتي سکر ۾ ملازمن جي مستقل ڀرتي بابت درخواست تي ٻڌڻي ڪئي. سيڪريٽري هيومن رائٽس سنڌ اڪرم علي خواجا عدالت ۾ پيش ٿيو ۽ موقف اختيار ڪيو ته عدالتي حڪم جي ڪاپي ناهي ملي، ڪجهه وقت ڏنو وڃي. جسٽس محمد علي مظهر رمارڪس ڏنا ته آڪٽوبر 2024 ۾ عدالت ٻن مهينن اندر مستقل ڪرڻ جو حڪم ڏنو هو، عملدرآمد اڃا تائين ڇو نه ٿيو؟ عدالت سيڪريٽري کي ٽن هفتن اندر درخواستن جو جائزو وٺڻ ۽ عدالتي حڪم تي عملدرآمد جي رپورٽ پيش ڪرڻ جي هدايت ڪئي. ياد رهي ته يعقوب سميت ٻين ملازمن مستقل نه ٿيڻ تي توهين عدالت جي درخواست داخل ڪئي هئي.
