ني پي تو (م ڊ) ميانمار جي فوج جي سربراهه ملائيشيا جي وزيراعظم انور ابراهيم کي فون تي ٻڌايو ته 28 مارچ تي آيل زلزلي ۾ فوتگين جو انگ 1700 ٿي ويو آهي. زلزلي ۾ 3400 کان وڌيڪ زخمي ٿيا جڏهن ته 300 کان وڌيڪ لاپتا آهن ۽ فوتگين ۾ واڌ جو خدشو آهي. ميانمار ۾ امدادي ٽيمون 7.7 شدت جي زلزلي سبب تباهه ٿيل عمارتن هيٺان ڦاٿل ماڻهن جي ڳولا ڪري رهيون آهن. ڊهي پيل عمارتن ۾ هوٽل، اسڪول، مسجدون ۽ گهر شامل آهن. ملڪ جي فائر سروسز ڊپارٽمينٽ موجب، جمعي تي آيل زلزلي جي مرڪز جي ويجهو منڊالي ۽ ساگانگ سميت ڪيترن ئي علائقن مان ملبي مان ماڻهن کي جيئرو ڪڍيو ويو جڏهن ته ڪيترائي لاش ڪڍيا ويا. ساگانگ شهر ۾، 36 ماڻهن کي بچايو ويو ۽ 88 لاش ملبي مان ڪڍيا ويا آهن. اختيارين جو چوڻ آهي ته منڊالي ۾ 161 ماڻهو فوت ٿي ويا جڏهن شهر جي ڏکڻ ۾ پياو بوا ٽائون شپ ۾ عمارتون ڪري پيون. يو هالا ٿيئن مندر جي ملبي مان تيرهن راهبن کي ڪڍيو ويو آهي، هيل تائين 58 ڄڻن کي بچايو ويو ۽ 200 کان مٿي ڦاٿل آهن. ميانمار جي راڄڌاني، ني پي تو ۾ هڪ عمارت جي ملبي هيٺان 30 ڪلاڪن کان وڌيڪ وقت تائين ڦاٿل رهڻ کان پوءِ هڪ بزرگ عورت کي بچايو ويو آهي.
