ممبئي (ويب ڊيسڪ) ڀارتي فاسٽ بالر جسپريت بمرا آءِ پي ايل 2025 جي شروعاتي ميچن ۾ حصو نه وٺي سگهندو.
پرڏيهي ميڊيا رپورٽس موجب، بمرا اڃا تائين چليهه جي انجري مان مڪمل طور ڇوٽڪارو حاصل ناهي ڪري سگهيو.
واضح رهي ته هو هلندڙ سال جنوري ۾ بارڊر گواسڪر ٽرافي جي آخري ميچ دوران انجري جو شڪار ٿيو، انجري سبب هو چيمپيئنز ٽرافي ۾ به ڀارت جي نمائندگي نه ڪري سگهيو.
هاڻي ذريعن جو چوڻ آهي ته هو آءِ پي ايل فرنچائز ممبئي انڊينز لاءِ شروعاتي ميچون به نه کيڏي سگهندو.
مارچ ۾ ممبئي انڊينز جون ٽي ميچون شيڊيول آهن، پر کيس ٽيم ۾ شامل ڪرڻ لاءِ مئنيجمينٽ کي بي سي سي آءِ جي بئنگلورو ۾ موجود سينٽر آف ايڪسيلينس جي ميڊيڪل ٽيم جي منظوري ضروري هوندي.
ذريعن موجب، بمرا اپريل کان ٽورنامينٽ جي ٻئي مرحلي ۾ ايڪشن ۾ نظر ايندو.
بمرا پنهنجي انوکي بالنگ ايڪشن سبب ماضي ۾ پڻ انجريز جو شڪار رهيو آهي، جنهن سبب بي سي سي آءِ جي ميڊيڪل عملي، سليڪٽرن، ۽ ٽيم انتظاميا سندس ورڪ لوڊ مئنيج ڪرڻ لاءِ احتياط ڪري رهي آهي.
ان ڏس ۾ نيوزيلينڊ جي اڳوڻي فاسٽ بالر شين بانڊ، جيڪو ماضيءَ ۾ ممبئي جي ڪوچنگ به ڪري چڪو آهي خبردار ڪيو آهي ته جيڪڏهن بمرا ٻيهر ساڳي انجري جو شڪار ٿيو ته سندس عالمي ڪيريئر وقت کان اڳ ختم ٿي سگهي ٿو.
