ڪراچي(رپورٽر)سنڌ جي گھرو وزير ضياءُالحسن لنجار جي صدارت هيٺ اعليٰ سطحي اجلاس ۾ ٽريفڪ حادثن جا سبب، روڊن ۽ شاهراهن تي حادثن جي روڪٿام لاءِ اثرائتا قدم کڻڻ بابت بريفنگ ڏني وئي، اجلاس ۾ ميئر ڪراچي مرتضيٰ وهاب، آءِ جي سنڌ غلام نبي ميمڻ، ايڊيشنل آءِ جي ڪراچي جاويد عالم اوڍو، ڪمشنر ڪراچي، ٽرانسپورٽ ۽ ايڪسائيز اينڊ ٽيڪسيشن جا صوبائي سيڪريٽريز ۽ ٻين لاڳاپيل عملدارن شرڪت ڪئي. گھرو وزير هدايت ڪئي ته ڪمشنر ڪراچي گذريل اجلاس ۾ ڪيل فيصلن تي عملدرآمد بابت باقاعده اعلاميو جاري ڪري ته جيئن انهن فيصلن جي ڀڃڪڙي ٿيڻ جي صورت ۾ سيڪشن 144 لاڳو ڪري سگهجي. هن وڌيڪ چيو ته ٽريفڪ جي رواني کي يقيني بڻائڻ لاءِ ٿاڻن ۽ ٽريفڪ پوليس کي گڏجي ڪم ڪرڻو پوندو. ايندڙ ڏينهن ۾ پاڻ به آپريشن ۽ ٽريفڪ پوليس جي ايس ايس پيز جو اجلاس طلب ڪندس. هن سال حادثن جي انگ ۽ زخمين بابت پڇاڳاڇا تي ڊي آءِ جي ٽريفڪ ڪراچي ٻڌايو ته موٽر ويز ۽ هاءِ ويز تي مجموعي طور 113 حادثن ۾ 127 شهري جڏهن ته ڪراچي جي روڊن تي 70 حادثن ۾ 79 شهري فوت ٿيا جن ۾ اڪثريت موٽرسائيڪل سوارن جي هئي. هيڊ ڪانسٽيبل رينڪ جي عملي کي به چالان جاري ڪرڻ جو اختيار ڏيڻ ۽ باڊي وارن ڪيمراز سان ليس آفيسرن جو انگ وڌائڻ جي هدايت ڪئي وئي آهي،گهرو وزير چيو ته ڪراچي شهر ۾ صرف ڪچرو کڻڻ وارين ۽ ضروري ڳري گاڏين کي داخل ٿيڻ جي اجازت هوندي، جڏهن ته ٻين ڳري گاڏين تي پابندي هوندي ڪراچي جي شاهراهن کي بند ڪرڻ جي اجازت ڪنهن کي به نه ڏني ويندي، ٻي صورت ۾ اهڙن عنصرن خلاف ڪارروائي ٿيندي. آءِ جي سنڌ چيو ته حادثن کان محفوظ رکڻ لاءِ خاص طور موٽرسائيڪل سوارن ۾ ٽريفڪ قانون تي عمل ڪرائڻ لاءِ شعور اجاگر ڪرڻ جي مهم هلائڻ جي ضرورت آهي.
