شڪارپور (رپورٽ: ذوالفقار مگسي)شڪارپور جو گونجدار آواز خاموش ڪيو ويو، پيرا ميڊيڪل جو اڳواڻ اعجاز احمد ڪاڪيپوٽو ھٿياربندن ھٿان قتل ٿي ويو، گذريل ڏينهن پيرا ميڊيڪل اڳواڻ اعجاز احمد ڪاڪيپوٽو موٽر سائيڪل تي شڪارپور کان پنھنجي ڳوٺ دلمراد ڪاڪيپوٽو وڃي رهيو هو ته نيو فوجداري ٿاڻي جي حد ۾ بيد کمڻ ڀرسان نامعلوم ھٿياربندن فائرنگ ڪري کيس قتل ڪري ڇڏيو، پوليس ۽ وارثن پهچي لاش اسپتال منتقل ڪيو، ڊاڪٽرن موجب کيس مٿي ۾ گولي لڳي، واقعي جي اطلاع تي شھري سياسي سماجي مذهبي تنظيمن جا اڳواڻ ۽ ڪارڪن سول اسپتال پھتا، پوليس ضروري ڪارروائي بعد لاش وارثن حوالي ڪيو، جنازي نماز گل شاھ پير وٽ ادا ڪئي وئي جنھن ۾ وڏي انگ ۾ ماڻهن شرڪت ڪئي، ھوڏانھن ڊي ايس پي سٽي پارس بکراڻي ڪاڪيپوٽو ھائوس پھچي مقتول جي وارثن اياز ڪاڪيپوٽو ۽ ٻين سان ملاقات ڪري واقعي جا تفصيل ورتا ۽ پوليس کي فوري جوابدار گرفتار ڪرڻ جو جو حڪم ڏنو، ٻي پاسي ڊي ايس پي سٽي پارس بکراڻي ميڊيا سان ڳالھائيندي چيو ته وارثن جي مرضي موجب ايف آءِ آر داخل ڪري جوابدارن کي گرفتار ڪيو ويندو ۽ متاثر خاندان سان انصاف ڪيو ويندو، مقتول جي وڏي فرزند اياز ڪاڪيپوٽو چيو ته اسان سان وڏو ناحق ٿيو آھي، اسانجو پنھنجي برادري جي ماڻھن سان زميني معاملو ھيو جنھن جو ڪجھه مھينا اڳ ايم پي اي عارف خان مھر وٽ فيصلو به ٿيو ھو جنھن ۾ مخالف ڌر وارا ڪوڙا ثابت ٿيا جنهن بعد حملو ڪري والد کي قتل ڪيو ويو، آخري اطلاعن تائين ملوث جوبدار گرفتار ٿي نه سگھيس ۽ نه ئي ڪيس داخل ٿيو.
