اسلام آباد (اعزاز سيد/آصف بشير چوڌري) 16 ڊسمبر 1971 جي الميي کي 53 سال ٿي ويا آهن، پر ان واقعي جا سبق اڄ به اسان لاءِ اهم آهن. اردو کي سرڪاري ٻولي قرار ڏيڻ کان شروع ٿيل اختلاف قائداعظم محمد علي جناح جي غلطين مان هڪ اهم غلطي طور ڏٺو وڃي ٿو، جتي بنگالي ٻولي کي نظرانداز ڪيو ويو. ان کانپوءِ سياسي ۽ انتظامي فيصلن، خاص طور تي فوجي آپريشن ۽ اليڪشن جي نتيجن کي مڃڻ کان انڪار، ڀائرن جي وچ ۾ لاڳاپن کي خراب ڪري ڇڏيو. اڄ بنگلاديش ۾ حالتون تبديل ٿي رهيون آهن. شيخ مجيب الرحمان جا مجسما ٽٽي چڪا آهن، ۽ اتي پڻ غور جاري آهي ته ڇا اختلافن ۾ بنگلاديش جي به ڪا غلطي هئي. ان بدلجندڙ رويي کي پاڪستان لاءِ هڪ نئين شروعات جو موقعو سمجهڻ گهرجي. بنگلاديش سان لاڳاپا بهتر ڪرڻ لاءِ ڪجهه اهم قدمن تي غور ڪرڻ گهرجي. مثال طور، اسلام آباد ۾ موجود پهريون گهر، جيڪو هڪ بنگالي ٺاهيو هو اهو بنگلاديش کي تحفي طور ڏنو وڃي. اهو عمل ٻنهي ملڪن کي ويجهو آڻي سگهي ٿو. ساڳئي طرح، اسلام آباد جي آبپاره علائقي جو نالو، جيڪو هڪ بنگالي ٻارڙي جي نالي تي رکيل آهي، ٻنهي قومن جي تاريخي لاڳاپن کي اجاگر ڪري ٿو. جيئن تاريخ اسان کي سيکاري ٿي، اسان کي پنهنجي ماضي جي غلطين کي مڃڻو پوندو. جنرل مشرف به ان واقعي تي افسوس جو اظهار ڪيو هو، ۽ اهو وقت آهي ته قومي سطح تي به انهن غلطين جو ازالو ڪيو وڃي. ڀٽو صاحب فوجي آپريشن جي حمايت ڪئي هئي، ان ڪري پيپلزپارٽي کي پڻ ان حوالي سان بيان ڏيڻ گهرجي. هاڻي، جڏهن بنگلاديش طرفان نرم رويو نظر اچي ٿو، پاڪستان کي هڪ رٺل ڀاءُ کي واپس ويجهو آڻڻ لاءِ قدم کڻڻ گهرجن. ان سان نه رڳو تاريخ جا زخم ڀرجندا، پر ٻنهي ملڪن ۾ هڪ سٺو پاڙيسري لاڳاپو پڻ قائم ٿي سگهي ٿو.
