ڳالهين کان انڪار، ٽڪراءُ نه ٿا چاهيون، مدرسا بل کي سياسي آکاڙو نه بڻايو: فضل الرحمان

چارسده(م ڊ) جمعيت علماءِ اسلام (ف) جي سربراهه مولانا فضل الرحمان چيو آهي ته اجلاس سڏائي عالمن کي ورهائڻ جي سازش ڪئي وئي، علما خلاف سازش ڪئي پئي وڃي، حڪومت ان معاملي کي سياسي آکاڙو نه بڻائي، هن وقت اسان کي حڪومت جي ڪا به تجويز قبول ناهي، چارسده ۾ پريس ڪانفرنس ڪندي چيو ته رياست سان ٽڪراءُ نه پر رجسٽريشن چاهيون ٿا، اڄ نئون شوشو ڇڏيو ويو آهي ته اهو اڳ ۾ تعليم واري وزارت سان لاڳاپيل هو، اسان اهو ٻڌائڻ چاهيون ٿا ته ان مسودي ۾ سمورن مدرسن کي ڪنهن به فيڊريشن سان الحاق ڪرڻ جي مڪمل آزادي ڏني وئي آهي جيتوڻيڪ اهي سوسائٽي ايڪٽ تحت هجن. تعليم جي وزارت جي تحت يا ان سان لاڳاپيل چاهيون ٿا، اسان کي ڪو به اعتراض ناهي، هر مدرسو ان حوالي سان آزاد آهي.هن سوال ڪيو ته ان کي تڪراري ڇو بڻايو ويو؟ عالمن جي مقابلي ۾ عالمن کي ڇو آندو پيو وڃي؟ قوم ۽ مدرسن جي شاگردن کي گمراهه ڪيو پيو وڃي، اسين ڪالهه حتمي اعلان ڪرڻ وارا هئاسين پر وفاق المدارس العربيه پاڪستان جي سربراهه مفتي محمد تقي عثماني جي 17 ڊسمبر تي اجلاس طلب ڪرڻ بعد اسان اهو فيصلو روڪي ڇڏيو.هن چيو ته اسان قانون جي ڳالهه ڪري رهيا آهيون، مدرسن کي معاهدي جو پابند بڻائڻ جي ڪوشش ڪئي پئي وڃي، اسان جي ڪوشش آهي ته مدرسن کي قانون تحت رجسٽرڊ ڪيو وڃي، حڪومت ان معاملي کي سياسي ميدان نه بڻائي.هن چيو ته هن وقت اسان حڪومت جي ڪنهن به تجويز کي قبول نه ٿا ڪريون، حڪومت جي ڪنهن به تجويز کي قبول ڪرڻ ته پري جي ڳالهه آهي، اسان ان کي چمٽي سان پڪڙڻ لاءِ به تيار ناهيون، بل تي سموريون پارٽيون متفق آهن، فنانشل ايڪشن ٽاسڪ فورس (ايف اي ٽي ايف) ۽ انٽرنيشنل مانيٽري فنڊ (آءِ ايم ايف) جون شرطون قوم آڏو رکڻ گهرجن، حڪومت ۽ ٻيا ادارا ان کي ڇو لڪائي رهيا آهن، اهي سڀ ڳالهيون عوام جي سامهون اچڻ گهرجن.

1. عالمن پاران مدرسن بابت موجوده نظام کي برقرار رکڻ جو مطالبو

اسلام آباد ( م ڊ) اسلامي نظرياتي ڪائونسل جي سربرهه علامه راغب نعيمي چيو آهي ته مدرسن وارو معاملو تعليمي معاملو  آهي جنهن کي سياسي آکاڙو نه بڻايو وڃي. اسلام آباد ۾ مدرسن جي رجسٽريشن ۽ سڌارن بابت اجلاس کي خطاب ڪندي علامه راغب نعيمي چيو ته مدرسن جي نظام کي ڪنهن ٻاهرين ايجنڊا مان خطرو ناهي. هن وڌيڪ چيو ته مدرسن کي تعليم واري وزارت سان گڏ ئي واڳيل هئڻ گهرجي، مدرسن وارو معاملو تعليمي معاملو آهي تنهنڪري ان کي سياسي آکاڙو نه بڻايو وڃي.

1. مدرسا تعليمي ڊائريڪٽوريٽ سان ئي واڳيل رهندا، حڪومت ۽ عالمن ۾ اتفاق

اسلام آباد(م ڊ)اسلام آباد ۾ مدرسن جي رجسٽريشن ۽ سڌارن بابت حڪومتي اجلاس ۾ علماءَ مدرسن کي تعليم واري وزارت جي ماتحت رکڻ تي اتفاق ڪيو. تعليم وارو وزير خالد مقبول، مذهبي معاملن وارو وفاقي وزير چوڌري سالڪ حسين، ڊائريڪٽر جنرل ديني تعليم ميجر جنرل (ر) غلام قمر، علامه طاهراشرفي، ڊاڪٽر راغب نعيمي، مولانا عبدالڪريم آزاد، مفتي عبدالرحيم، خرم نواز گنڊاپور، فضل الرحمان. ملاقات ۾ خليل ۽ علامه ابتسام به موجود هئا. اجلاس ۾ عالمن ۽ عالمن مدرسن کي تعليم واري وزارت سان الحاق رکڻ تي اتفاق ڪيو. ڊائريڪٽر جنرل مذهبي تعليم ميجر جنرل (ر) غلام قمر چيو ته ننڍي کنڊ ​​جي تاريخ ۾ مدرسن جو وڏو ڪردار آهي اسان جو تعليمي نظام اسڪولن ۽ مدرسن تي مشتمل آهي،  مدرسن ۾ غريب ٻارن کي ديني ۽ دنياوي تعليم ڏني وڃي ٿي.  ڪابينا جي فيصلي کانپوءِ مدرسن جي حوالي سان هڪ معاهدو ٿي ويو ۽ فيصلو ڪيو ويو ته سمورن مدرسن کي ڊائريڪٽوريٽ آف ديني تعليم سان الحاق ڪيو ويندو.

1. حڪومت مدرسن جي رجسٽريشن بل جو مسودو جي يو آءِ حوالي ڪري ڇڏيو

اسلام آباد(م ڊ) حڪومت ديني مدرسن جي رجسٽريشن بل جو مسودو جي يو آءِ کي ڏئي ڇڏيو آهي، سينيٽر ڪامران مرتضيٰ چيو ته مدرسن جي رجسٽريشن جو معاملو اسلام آباد تائين محدود آهي، وفاقي حڪومت صوبن سان لاڳاپيل قانون سازي نه ڪندي ۽ انهن مدرسن تي حڪومت جو ڪجهه ڪنٽرول هوندو پر نصاب ۽ ٻين  معاملن ۾ اهي آزاد هوندا، هن چيو ته هن وقت پاڪستان ۾ ڪيترائي اهڙا مدرسا آهن جن جو ڪو به رڪارڊ نه آهي ۽ نه اهي سرڪاري اڪائونٽ ۾ آهن، ان ڪري هن بل جي منظوري کانپوءِ ملڪ ۾ سمورن مدرسن کي سوسائٽيز رجسٽريشن ترميمي بل تحت رجسٽرڊ ڪيو وڃي.

1. فضل الرحمان سميت سڀني لاءِ قابل قبول حل ڪڍنداسين: عطاءُ تارڙ

اسلام آباد(م ڊ) سڌ سماءَ واري وفاقي وزير عطاءُ الله تارڙ چيو آهي ته مدرسن بابت بل پيچيدگين سبب قانوني شڪل اختيار نه ڪري سگهيو، ڪوشش ڪندس ته مدرسن بابت فضل الرحمان سميت سڀني لاءِ قابل قبول حل ڪڍيو وڃي، هن چيو ته جڏهن ڪو قانون ٺاهيو ويندو آهي ته ان جي افاديت ڏٺي ويندي آهي، سمورن عالمن جي مشاورت کانپوءِ قانون ٺاهيو ويو هو.اسان جو مقصد آهي ته مدرسن کي هڪ اسٽريم هيٺ آڻيون، مدرسن کي تعليم واري وزارت سان ڳنڍڻ ئي بهترين حل آهي.