اسلام آباد(م ڊ) جڊيشل ڪميشن سنڌ هاءِ ڪورٽ ۾ آئيني بينچ لاءِ 9 ججن کي نامزد ڪري ڇڏيو آهي، جاري ڪيل پڌرائي موجب آئيني بينچن جي قيام لاءِ جڊيشل ڪميشن ۾ اڪثريت راءِ سان فيصلو ڪيو ويو ۽ آئيني بينچ لاءِ 9 ججن جي حق ۾ 11 ووٽ مليا، جسٽس منصور علي شاهه، جسٽس منيب اختر ۽ سنڌ هاءِ ڪورٽ جي چيف جسٽس اختلاف راءِ ڏني، جڏهن ته چيف جسٽس آف پاڪستان جسٽس يحيٰ آفريدي حق يا مخالفت ۾ ووٽ نه ڏنو، ذريعن موجب جڊيشل ڪميشن شبلي فراز ۽ عمر ايوب جو 2 ڪلاڪ انتظار ڪيو، ٻئي ڄڻا 2 وڳي تائين سپريم ڪورٽ جي عملي سان رابطي ۾ رهيا پر 2 وڳي کانپوءِ سندن فون بند ٿي ويو، پڌرائي ۾ چيو ويو آهي ته سنڌ هاءِ ڪورٽ جو جسٽس ڪي ڪي آغا آئيني بينچ ۽ آئيني ڪميٽي جو سربراهه هوندو، آئيني ڪميٽي جسٽس ڪي ڪي آغا جي سربراهي ۾ جسٽس عمر سيال، جسٽس محمد سليم جيسر به ٻڌل هوندي، ذريعن موجب آئيني بينچ ۾ جسٽس ذوالفقار علي سانگي، جسٽس ارباب علي هڪڙو، جسٽس يوسف علي سعيد، جسٽس خادم حسين سومرو، جسٽس ثنا منهاس اڪرام ۽ جسٽس عبدالمبين لاکو شامل آهن.
