بدين (رپورٽنگ ٽيم: رازق ڏنو کوسو/ ثوبيا کوسو) بدين ضلعي ۾ واقع يوسي ٻڍو قمبراڻي جي ديهه ڪانگڻي ۾ موجود گورنمينٽ هاءِ اسڪول عبدالحق ڀرڳڙي جا شاگرد ۽ شاگرياڻيون نصير ڪئنال تي پل نه هجڻ سبب اسڪول اچڻ ۽ وڃڻ ۾ مشڪلاتن ۽ تڪليفن کي منهن ڏئي رهيا آهن، شاگرد ۽ شاگرياڻيون والدين جي ڪلهي تي چڙهي اسڪول پهچڻ تي مجبور آهن، ان سلسلي ۾ شاگردن جي وارثن ”عوامي آواز“ سان ڳالهائيندي چيو ته نصير ڪئنال تي پل نه هجڻ سبب اسان کي پنهنجن ٻارڙن کي ڪلهن تي کڻي ڪئنال پار ڪرائڻو پوي ٿو، ٻارن کي ڪلهي تي کڻي اسڪول پهچائڻ کانسواءِ اسان وٽ ٻيو ڪو رستو ناهي، هر وقت خوف جا شڪار هوندا آهن، ڇو ته ٻارن جي زندگي داءُ تي لڳل هوندي آهي، شاگرد اسڪول به دير سان پهچن ٿا، سنڌ حڪومت پل ٺهرائڻ ۾ دلچسپي نه وٺي، شاگردن ”عوامي آواز“ سان ڳالهائيندي چيو ته اسان تعليم حاصل ڪرڻ چاهيون ٿا پر سنڌ ۾ ڀوتارڪو نظام تعليم دشمن نظام اسان لاءِ رڪاوٽون بڻيل آهي ۽ اسان ڪهڙو ڏوهه ڪيو آهي جو اسان کان تعليم جو حق کسيو پيو وڃي؟ اسڪول جي انتظاميه ”عوامي آواز“ سان ڳالهائيندي چيو ته وڏي تعداد ۾ شاگردن ڪئنال پار ڪرڻ واري خوف سبب اسڪول اچڻ ڇڏي ڏنو آهي سندن والدين کي خط به لکيا آهن، پر والدين جو چوڻ آهي ته نصير ڪئنال ۾ پاڻي جي سطح وڌڻ سبب ٻارن جي حياتين کي خطرو آهي، کين اسڪول نٿا موڪلي سگهون، انتظاميا وڌيڪ چيو ته اسڪول سامھون نصير ڪئنال تي لوھ واري پل ٺهي وڃي ته ٻار پنج منٽ ۾ اسڪول پھچي ويندا ۽ شاگردن جي زندگي به محفوظ ٿي ويندي، علائقي واسين مطالبو ڪيو آهي ته نصير ڪئنال تي پل ٺاهي ڏني وڃي ته شاگرد آساني سان اسڪول اچي ۽ وڃي سگهن ۽ تعليم پرائي سگهن.
