ڪراچي (رپورٽر) سنڌ جي وڏي وزير سيد مراد علي شاهه ڪراچي شهر جي ٽن اهم منصوبن ڪريم آباد انڊر پاس، ڪورنگي ڪاز وي برج ۽ ملير ايڪسپريس وي جي جائزي واري اجلاس جي صدارت ڪندي بلديات کاتي کي هدايت ڪئي آهي ته منصوبن جي وقت سر مڪمل ٿيڻ جو منصوبو پيش ڪيو وڃي . وڏي وزير مڪاني ادارن واري کاتي کان پڇاڻو ڪيو ته سمورا فنڊ وقت تي جاري ٿيڻ باوجود منصوبن جي مڪمل ٿيڻ ۾ ايتري دير ڇو ٿي رهي آهي؟ هن هدايت ڪئي ته ٽنهي منصوبن کي مقرر مدي اندر مڪمل ڪرڻ لاءِ پلان پيش ڪيو وڃي. اجلاس ڪالهه سومر ڏينهن وزيراعليٰ هائوس ۾ ٿيو جنهن ۾ مڪاني ادارن واري صوبائي وزير سعيد غني، ميئر ڪراچي مرتضيٰ وهاب، ۽ ٻين آفيسرن شرڪت ڪئي .اجلاس ۾ بريفنگ دوران وڏي وزير کي ٻڌايو ويو ته منصوبي جي لاڳت 3 ارب 80 ڪروڙ رپيا آهي مينا ۽ فيصل بازارن جي آڏو ٽريفڪ کي رواڻ رکڻ لاءِ هڪ رائونڊ ابائوٽ تعمير ڪيو پيو وڃي. وڏي وزير سعيد غني ۽ مرتضيٰ وهاب کي هدايت ڪئي ته تعميراتي ڪم کي تيز ڪيو وڃي ڇوته ان سان ٽريفڪ جي روانگي ۾ مشڪلاتون پيش اچي رهيون آهن،جڏهن ته ڪورنگي ڪاز وي تي پل جي تعمير بابت بريفنگ ڏيندي ٻڌايو ويو ته اهو منصوبو 6 ارب 40 ڪروڙ رپين سان شروع ڪيو ويو آهي. هي پروجيڪٽ 31 جنوري 2025ع تي مڪمل ٿيڻو آهي جيڪو شايد ممڪن نه هجي. ان تي وڏي وزير مڪاني ادارن واري وزير سعيد غني کي هدايت ڪئي ته هو ذاتي طور تي پل تي ڪم جي نگراني ڪري
