پي ٽي آءِ جي احتجاج سبب ملڪ ۾پيٽروليم شين جي کوٽ جو خدشو

اسلام آباد ( بيورو+م ڊ ) راولپنڊي، اسلام آباد جا رستا بند ٿيڻ سبب ڪيترن ئي پمپن تي پيٽرول ۽ ڊيزل جو ذخيرو ختم ٿيڻ جو خدشو آهي.جڏهن ته روڊ رستا بند هجڻ سبب ڀاڄين ۽ ٻين کاڌي پيتي جي شين جي کوٽ به امڪان آهي،  پيٽروليم ڊيلرز جو چوڻ آهي ته جيڪڏهن اڄ به روڊ بند رهيا ته پيٽرول پمپن تي کوٽ پيدا ٿي ويندي، جنهن سبب عوام کي پيٽروليم شين جي فراهمي ناممڪن ٿي ويندي.آئل ٽينڪر ڪانٽريڪٽرز ايسوسي ايشن به اسلام آباد ۾ روڊن جي بندش تي ڳڻتي جو اظهار ڪندي اسلام آباد، راولپنڊي ۽ لاهور ۾ پيٽرول بحران جو خدشو ظاهر ڪيو آهي.پيٽروليم واري وزارت پيٽرول ۽ ڊيزل جي سپلاءِ ۾ خلل جو نوٽيس ورتو آهي.ترجمان پيٽروليم ڊويزن جو چوڻ آهي ته سمورين آئل مارڪيٽنگ ڪمپنين کي هدايت ڪئي وئي آهي ته پيٽرول ۽ ڊيزل جي فراهمي يقيني بڻائين. واضح رهي ته پي ٽي آءِ قافلو سست رفتاري سان گادي واري هنڌ ڏانهن وڌي رهيو آهي جنهن سبب ڪيترائي اهم رستا سيل ڪيا ويا آهن. سڪيورٽي فورسز جي وڏي نفري پڻ شهر ۾ مقرر ڪئي وئي آهي .

1. مڪي ۽ ٻين علائقن ۾ تيز برسات،  روڊ رستا ٻڏي ويا

رياض ( م ڊ ) مڪي ۽ ٻين علائقن ۾ تيز برسات سبب روڊ رستا ٻڏي ويا، سومر ڏينهن مڪي، طائف، سيل ڪبير ۽ ٻين علائقن ۾ تيز برسات پئي. مڪي ۽ طائف ۾ روڊ رستا ٻڏي ويا، جنهن کانپوءِ احتياطي طور انڊر پاسز بند ڪيا ويا آهن.سعودي عرب جي ٻين ڪيترن ئي علائقن ۾ اڄ تائين گجگوڙ سان برسات جي اڳڪٿي ڪئي وئي آهي. راڄڌاني رياض، قاسم، حليم، اترين سرحدن، شرقيه، بهاءِ ۽ عسير ۾ به برسات جي اڳڪٿي ڪئي وئي آهي. مڪي جي علائقي محيل عسير، رجال الموم ۽ القنفوطه ۾ اسڪول بند ڪرڻ جي هدايت ڪئي وئي آهي. تعليم کاتي موجب اڄ اسڪولن ۾ آن لائين پورٽل ذريعي تعليم ڏني ويندي.

1. بنگلاديش ۾ انتها پسندن جي ڌمڪين کانپوءِ رٿيل رواداري ميوزڪ ميلو رد

ڍاڪا ( م ڊ ) انتها پسندن جي ڌمڪين کانپوءِ ’رواداري‘ ميوزڪ فيسٽيول رد ڪيو ويو آهي . اهو ميلو 17هين صديءَ جي بنگالي سماج سڌارڪ لالن شاهه جي عقيدتمندن پاران منعقد ڪيو هو ، جنهن ۾ هندومت ۽ تصوف جي ميلاپ کي هٿي ڏنو ويو. مذهبي رواداري کي هٿي ڏيڻ لاءِ بنگلاديش جي صوفياڻي فرقي اسلامي  انتهاپسندن جي ڌمڪين بعد پنهنجو مشهور ميوزڪ فيسٽيول رد ڪري ڇڏيو آهي، هن کي آگسٽ ۾ شاگردن جي اڳواڻي واري سياسي انقلاب کان وٺي انتشار واري مذهبي لاڳاپن جو تازو شڪار قرار ڏنو پيو وڃي.

1. ڪرم ۾ دهشت گردي پٺيان آمريڪا جو هٿ آهي: ميان افتخار حسين

پشاور ( م ڊ ) عوامي نيشنل پارٽي خيبرپختونخواهه جي صدر ميان افتخار حسين چيو آهي ته صوبي ۾ دهشتگردي جي پويان منظم قوتون آهن، دهشتگردي جي پويان آمريڪا جو هٿ آهي، عوامي نيشنل پارٽي پاران خيبرپختونخواهه ۾ بدامني خلاف احتجاجي مظاهرو ڪيو ويو، مظاهري  ۾ صوبائي قيادت ۽ ڪارڪنن وڏي انگ ۾ شرڪت ڪئي، مظاهرين کي خطاب ڪندي صوبائي صدر ميان افتخار حسين چيو ته آمريڪا سي پيڪ خلاف مسلسل سازش ڪري رهيو آهي، هو ان واقعي جي سخت مذمت ڪن ٿا، هن چيو ته پارا چنار ۾ منظم انداز ۾ فرقيوار فساد ڪرايو پيو وڃي، وڏي وزير کي صوبي جي ڪا به پرواهه ناهي، صوبي جي عوام کي اپيل ڪريان ٿو ته دهشتگردن جي سازشن ۾ نه اچن، ميان افتخار حسين چيو ته وڏو وزير جلسن ۽ جلوسن لاءِ صوبي جا وسيلا استعمال ڪري رهيو آهي، وفاق ۽ صوبي جو ڳٺ جوڙ آهي، خيبرپختونخواهه کي ڪير به پڇڻ وارو ناهي، اي اين پي اڳواڻ چيو ته اسان کي دشمن خلاف ثابت قدم رهڻو پوندو، اسان ڪرم جي عوام سان گڏ آهيون، اسان رڳو امن چاهيون ٿا، اسان عوام کي اپيل ٿا ڪريون ته فرقيواراڻي فسادن ۾ هڪ ٻئي کي قتل نه ڪيو وڃي، هن چيو ته اسان کي اسيمبلين مان زبردستي ڪڍيو ويو، وڏو وزير گنڊاپور هميشه احتجاجن کان ڀڄندو آهي، هڪ ڀيرو ٻيهر احتجاجن کان ڀڄي ويندو ۽ واپس ايندو. عوامي نيشنل پارٽي جي صوبائي سربراهه چيو ته صوبائي حڪومت دهشتگردن جي حڪومت آهي، گهرو وزير رڳو مذمت ڪرڻ لاءِ ويٺو آهي،دهشتگردي فيض حميد جا بقايات ڪري رهيا آهن. .