اسرائيلي فوج چيو آهي ته ڏکڻ لبنان ۾ حزب الله خلاف زميني آپريشن شروع ڪيو ويو آهي. حزب الله اسرائيلي فوجين کي نشانو بڻائڻ جي دعويٰ به ڪئي آهي. ساڳئي وقت لبنان ۾ اسرائيل جي ڪارروائي بعد ھڪ اندازي موجب ھڪ کان ڏيڍ لک ماڻھن شام ڏانھن لڏپلاڻ ڪئي آھي.اسرائيل ھڪ ئي وقت غزا ۾ حماس،لبنان ۾ حزب اللھ، يمن ۾ حوثين سميت شام تي بھ مسلسل حملا ڪري رھيو آھي.
اسرائيلي دفاعي فورسز اڱاري ڏينهن چيو آهي ته ڏکڻ لبنان ۾ سومر جي رات دير سان هڪ زميني فوجي آپريشن شروع ڪيو ويو آھي.جنھن کي ’آپريشن ناردرن ايروز‘ جو نالو ڏنو ويو آهي، جنهن ۾ لبنان جي انهن علائقن ۾ آپريشن ڪيو ويندو، جيڪي اسرائيل لاءِ خطرو بڻيل آهن. اسرائيلي فوج مطابق، غزه ۾ حماس جي خلاف حملا جاري رهندا،
اسرائيلي دفاعي فورسز موجب ڏکڻ لبنان ۾ حزب الله جي دهشتگردن جي مقصدن ۽ بنيادي ڍانچي خلاف محدود پئماني جي ڪارروائي ڪئي وئي آھي.جنھن ۾ مقامي ۽ ھدف بڻايل زميني حملا شروع ڪيا ويا آھن. اھا ڪارروائي انٽيليجنس جي معلومات تحت ڪئي وئي آهي. محدود حملن لاءِ زميني فوج کي هوائي فوج ۽ آرٽلري فورسز جي مدد حاصل آهي.
ساڳئي وقت لبنان جي فوجي تنظيم حزب الله دعويٰ ڪئي آهي ته هن اڱاري جي صبح المطلع جي سرحدي علائقي ۾ اسرائيلي فوجين کي نشانو بڻايو. اسرائيلي فوج حملن جي تصديق ڪئي، پر چيو ته آھي تھ ڪجهه راڪيٽ هوا ۾ تباهه ٿي ويا ۽ ڪجهه خالي ميدانن ۾ ڪريا.
لبنان جي صحت واري وزارت چيو آهي ته سومر تي لبنان ۾ اسرائيلي هوائي حملن ۾ اٽڪل 95 ماڻهو مارجي ويا ۽ 172 زخمي ٿيا. لبنان ۾ گذريل ٻن هفتن ۾ هڪ هزار کان وڌيڪ ماڻهو مارجي ويا آهن جڏهن ته هن وقت تائين هڪ لک کان وڌيڪ بي گهر ٿي چڪا آهن.
.
لبنان ۾ ڇڪتاڻ واري صورتحال سبب دنيا جي ٻين ملڪن به پنهنجي شهرين کي هي ملڪ ڇڏڻ جي اپيل ڪئي آهي، جڏهن ته دنيا جي ڪيترين ئي ايئرلائنز به لبنان ۾ پنهنجا آپريشن بند ڪري ڇڏيا آهن.
