اسلام آباد (بيورو) حڪومت مخالف پارٽين آئين جي بحاليءَ لاءِ ملڪ گير مهم شروع ڪرڻ جو فيصلو ڪيو آهي، جڏهن ته ڪراچي ۾ جلسو ڪرڻ لاءِ انتظاميه جي رويي خلاف عدالت سان رابطو ڪيو ويو. پنجاب جي شهر فيصل آباد ۾ به جلسو ڪرڻ جو فيصلو ڪيو ويو. پشتونخوا ملي عوامي پارٽي جي چيئرمين محمود خان اچڪزئي جي صدارت هيٺ اسلام آباد ۾ حڪومت مخالف پارٽين جي اتحاد تحفظ آئين پاڪستان جو اهم اجلاس ٿيو، جنهن ۾ قومي اسيمبليءَ ۾ مخالف ڌر جي اڳواڻ، تحريڪ انصاف جي جنرل سيڪريٽري عمر ايوب ۽ پي ٽي آءِ جي مرڪزي اڳواڻ اسد قيصر، سني اتحاد ڪائونسل جو سربراهه صاحبزاده حامد رضا، بي اين پي مينگل گروپ جو اڳواڻ ساجد ترين ۽ ثناءُ الله بلوچ، مجلس وحدت مسلمين جي اسد شيرازي ۽ تحريڪ تحفظ آئين جي ترجمان اخونزاده حسين يوسفزئي پڻ شرڪت ڪئي. اجلاس ۾ ملڪي سياسي صورتحال بابت اهم فيصلن جي منظوري ڏني وئي، اپوزيشن اتحاد آئين جي بحالي لاءِ ملڪ گير مهم شروع ڪرڻ جو فيصلو ڪيو ۽ تحريڪ کي اڳتي وڌائڻ تي غور ويچار ڪيو ويو. اجلاس ۾ فيصل آباد ۽ ڪراچي ۾ ٿيندڙ جلسن لاءِ انتظاميه خلاف عدالت سان رابطن ڪرڻ جو به فيصلو ڪيو ويو. مخالف ڌر جي اتحادي چيو ته عوامي ميڙاڪا ڪرڻ اسان جو آئيني، قانوني ۽ جمهوري حق آهي، جلسا هر صورت ۾ ٿيندا رهندا، هن وقت ملڪ ۾ جمهوريت ختم ٿي چڪي آهي ۽ آئين سان کيڏيو پيو وڃي، اسان جي تحريڪ آئين جي بحاليءَ تائين جاري رهندي. تحفظ آئين پاڪستان جي قيادت 7 مئي جي پريس ڪانفرنس کي غير آئيني، غيرقانوني ۽ اختيار کان مٿاهين قرار ڏيندي رد ڪئي وئي. اجلاس ۾ مطالبو ڪيو ويو ته ملڪ ۾ آئين ٽوڙيندڙن کي قوم کان معافي وٺڻ گهرجي. اجلاس ۾ گوادر ۾ دهشتگردي جي واقعي ۾ 7 بيگناهه ماڻهن جي قتل جي مذمت ڪندي سندن گهرڀاتين سان ڏک جو اظهار ڪيو ويو. اجلاس ۾ لاهور هاءِ ڪورٽ بار جي وڪيلن تي تشدد ۽ گرفتارين جي مذمت ڪئي وئي، اجلاس ۾ پنجاب ۾ هارين سان ٿيندڙ ناروا سلوڪ جي به سخت مذمت ڪئي وئي. اپوزيشن اتحاد چيو ته اپوزيشن اتحاد هارين جي مطالبن جي حق ۾ ساڻن گڏ آهي.
