ڪراچي (محسن ٻٻر)تازو ئي سي ايس ايس جو امتحان پاس ڪري اي ايس پي بڻجندڙ ڪشمور واسي نياڻي صبا زين ٻپڙ چيو آهي ته سنڌ جي تعليم جو معيار پنجاب ۽ ڪي پي ڪي کان تمام گهڻو پوئتي پيل آهي. اتان جي سي ايس ايس جي تياري وارا مرڪز اعلي’ معيار جا آهن، پر سنڌ ۾ اهڙا ناهن. جيڪڏهن اسان به اهڙوڪلچر وڌايون ته سنڌ جا نوجوان به انهن سان مقابلو ڪري سگهن ٿا. هن چيو ته رهنمائي نه هجڻ ڪري سنڌ جا نوجوان ان امتحان ۾ گهٽ پاس ٿين ٿا. اسان وٽ سي ايس ايس جا مضمون پڙهائيندڙ ماهر به ناهن، جڏهن ته پنجاب ۾ وڏا ماهر موجود آهن، جنهن جي ڪري هتان جا نوجوان سي ايس ايس جي تياري لاءِ لاهور ۽ ٻين شهرن ڏانهن ويندا آهن. هن چيو ته سماج جي سوچ جي ڪري سي ايس ايس آفيسرن جو مقصد ملڪيتون ٺاهڻ سمجهيو پيو وڃي.
-
سي ايس ايس امتحان: ڪراچي مان رڳو 7 اميدوار ڪامياب ٿيا
ڪراچي(عوامي آواز نيوز) فيڊرل پبلڪ سروس ڪميشن پاران جاري ڪيل سي ايس ايس امتحان جي ڪامياب اميدوارن جي لسٽ ۾ ڪجهه حيرت ڪندڙ حقيقتون سامهون آيون آهن، ڪوٽا جي حساب سان سڀ کان گهٽ چونڊيل اميدوارن جو سنڌ جي شهري علائقن خاص طور تي ڪراچي مان رڳو 7 جڏهن ته سنڌ ٻهراڙي جي علائقن ۾ ڪامياب اميدوارن جو انگ 32 آهي، سڀ کان وڌيڪ ڪامياب ٿيندڙ اميدوارن جو تعلق پنجاب سان آهي جن جو انگ 128 آهي،بلوچستان جي 31،خيبرپختونخوا 20،آزاد ڄمون ڪشمير 5 ۽ گلگت بلتستان ۽ اڳوڻي فاٽا مان 4 ڪامياب اميدوار شامل آهن، امتحان ۾ 13 هزار اميدوار شريڪ ٿيا جن مان 386 ڪامياب ٿيا
