ڪراچي(م ڊ) ايم ڪيو ايم پاڪستان جي سينيئر اڳواڻ ڊاڪٽر فاروق ستار چيو آهي ته سنڌ حڪومت شهر کي ڌاڙيلن جي حوالي ڪري ڇڏيو آهي، ايم ڪيو ايم عوام کي ڦورن ۽ چورن جي رحم ڪرم تي نه رهڻ ڏيندي. ٻئي طرف ايم ڪيو ايم پاڪستان علي سهريءَ کي سنڌ اسيمبلي ۾ مخالف ڌر جو اڳواڻ نامزد ڪري ڇڏيو آهي.ڪراچي ۾ ايم ڪيو ايم جي سنڌ اسيمبلي ميمبرن جو اجلاس فاروق ستار جي صدارت هيٺ ٿيو. جنهن ۾ شهر قائد ۾ امن امان جي بگڙيل صورتحال تي ڳڻتي جو اظهار ڪيو ويو.ان موقعي تي فاروق ستار چيو ته شهر ۾ روز سوين واقعا ٿي رهيا آهن، هو شهرين جي قتل عام جي مذمت ڪن ٿا.هن چيو ته سنڌ حڪومت امن امان قائم ڪرڻ ۾ ناڪام ٿي چڪي آهي، شهر ۾ ڪٿي به حڪومت ۽ انتظاميه جو وجود نظر نٿو اچي.
