ڪامريڊ شبير شر جي جيل ڊائري واري ڪتاب جي مهورتي تقريب جو احوال

زرار پيرزادو

¨ ڪامريڊ شبير شر جي ڪجهه سال اڳ سنڌيءَ ۾ لکيل جيل ڊائري ” ڊانڊرس جو قيدي“ جنهن جو هاڻي اظهر نوناري صاحب انگريزي ٻولي ۾ ترجمو ڪيو آهي تنهن انگريزي ڪتاب جي ڪالهه 9 ڊسمبر 2023ع تي آرٽس ڪائونسل ڪراچي ۾ مهورتي تقريب ٿي گذري. جنهن ۾ صاحب ڪتاب ڪامريڊ شبير شر، امداد چانڊيي، ڪمال وارثي، ڊاڪٽر جبار خٽڪ، حميده گهانگهرو، مظهر عباس، مجاهد بريلوي، محمد خان سولنگي، ڊاڪٽر ايوب شيخ ۽ وجاهت جاگيراڻيءَ خطاب ڪيو .

¨  هن پروگرام جي خاص ڳالهه ڪامريڊ شبير جي سياسي جدوجهد ۽ جيل ۾ گهاريندڙ سندس ڪجهه ساٿين جي شرڪت هئي  جن نه رڳو هن جيل ڊائريءَ تي ڳالهايو پر مجموعي طور ان ڪميونسٽ تحريڪ جو اڄ جي حالتن جي روشني ۾ جائزو به ورتو.

¨ ڪامريڊ شبير شر جي جيل ڊائري جو اهو ڪتاب، ضياءَ الحق جي سخت ترين مارشل لا ۾”ڄام ساقي ڪيس“ ۾ سندس  گرفتاري ۽ جيل جي اندر واري گهاريل ڊگهي دور جو هڪ لحاظ کان اڇو چٺو  ۽ ڪامريڊن جي سياسي جدوجهد جو تاريخي ڳٽڪو آهي،  بقول ڪامريڊ حميده گهانگهرو جي ته هڪ اهڙو ڪتابي آئينو آهي جنهن ۾ هر ڪو پنهنجي ادا ڪيل ڪردار کي ڏسي سگهي ٿو.

¨ مظهر عباس ۽ ڊاڪٽر جبار خٽڪ جو خيال هو ته ذاتي اختلافن کي ڪتابن ۾ لکڻ يا شخصيتن کي لوئڻ کان پاسو ڪرڻ گهرجي. اصل ڳالهه تاريخ اندر سندن جدوجهد ۽ قربانيون آهن جن کي نظر انداز نه ڪرڻ گهرجي. ڊاڪٽر جبار چيو ته سنها ٿلها اختلاف ته هڪ گهر ۾ رهندڙ ڀاتين ۾ به ٿيندا  آهن انهن تي وقت ضايع ڪرڻ بدران شين کي نظرياتي پاسن سان ڏسڻ گهرجي.

¨ امداد چانڊيي ۽ ڪمال وارثي جو خيال هو ته ڪجهه واقعا يا حوالا ڪتاب ۾ درست ناهن ڏنا ويا جن کي درست ڪري ايندڙ ڇاپي ۾ شامل ڪيو وڃي، ان موقعي تي سڀني مقررن چيو ته بهرحال ان حقيقت کان ڪنهن کي به انڪار ناهي ته ڪامريڊ شبير پنهنجي حصي جي تاريخ لکي تمام وڏو ڪم ڪيو آهي، جنهن جي جيتري واکاڻ ڪجي گهٽ آهي. اهڙو ڪم ٻين ڪامريڊن کي به ڪرڻ گهرجي.

¨ صاحب ڪتاب ڪامريڊ شبير شر چيو ته منهنجي لکيل هن ڪتاب واري مواد سان پڻ وڏيون وارداتون ٿيون آهن، جيل ۾ لکيل چڱو خاصو مواد اتان گم ڪيو ويو، وري نظرثاني لاءِ جنهن ڪامريڊ کي مواد موڪليم تنهن کان به اهو گم ٿي ويو، شڪر جو مون وٽ فوٽو اسٽيٽ ڪاپي هئي. سندس چوڻ هو ته مون اهو ڪتاب ڇپائڻ کان اڳ جن دوستن کي ڏيکاريو تن کي ڪا نشاندهي يا درستگي ڪرڻي هئي ته ڪرڻ گهرجي هان، باقي مان جيڪو ڪجهه لکيو آهي ان تي هاڻي به قائم آهيان.

¨ ڪامريڊ شبير شر چيو ته منهنجي اها به بدقسمتي رهي جو هن ڪتاب کان اڳ منهنجو استاد انور پيرزادو لاڏاڻو ڪري چڪو هو نه ته مان ان کي هي ڪتاب لازمي طور ڏيکاري پوءِ ڇپرايان هان. هن چيو ته اسانکي انور صاحب ئي لکڻ تي زور ڀريندو هو.

¨ اها تمام سٺي ڳالهه آهي ته هاڻي سنڌي ڪتابن جو اردو ۽ انگريزي ٻولي ۾ ترجمو ٿيڻ جو سلسلو شروع ٿي ويو آهي جنهن جو فائدو اهو آهي ته غير سنڌين کي به سنڌ جي سياست، تاريخ ۽ ادب جي ڄاڻ ملندي جنهن جي تمام پراڻي وقت کان ضرورت محسوس ٿيندي رهي هئي.

¨ مان ڪامريڊ شبير شر جو سنڌيءَ ۾ ڇپيل اهو ڪتاب ڪجهه وقت اڳ پڙهيو هو. ۽ سندس لکڻي جي چاشني مان متاثر ٿيو هوس. ڪامريڊ شبير شر اهو ڪتاب ايئن ئي لکيو آهي جيئن هو ڳالهائڻ  ۾ بيباڪ، سچو ۽ کرو هوندو آهي.

¨ اها مهورتي تقريب نوجوانن تي ٻڌل تنظيم ”پروگريسو اسٽوڊنٽس ڪليڪٽو “ ڪرائي، اهو ثابت ڪيو  آهي ته اها تنظيم پاڻ کي نه رڳو ڪميونسٽ پارٽي توڙي کاٻي ڌر جي سياست جو تسلسل سمجهي ٿي پر ان عظيم سياسي ورثي تي فخر به ڪري ٿي ۽ ان فخر کي نئين نسل ڏانهن منتقل به ڪري ٿي. هي پروگرام ان رخ ۾ هڪ تمام وڏي اتساهيندڙ وک هئي. جنهن جي ان تنظيم جي صدر ڪامريڊ جسونت سنگهه، ورثا پيرزادا، ڪائنات انصاري، شهنشاهه حسين شر ۽ ٻين ميمبرن کي دل جي گهراين سان مبارڪباد ڏجي ٿي.

¨ سو نوٽ ڪرڻ جي ڳالهه اها آهي ته ڪنهن به انقلابي تحريڪ جي ان کان وڏي حاصلات ڀلا ٻي ڪهڙي ٿي سگهي ٿي ته نئون نسل اوهان جي انقلابي تحريڪ تي فخر ڪري ۽ ان کي اتان کان وري شروع ڪري، ڪالهوڪي پروگرام جو سڀ کان وڏو اتساهيندڙ نتيجو اهو ئي آڏو آيو آهي.

You might also like
Leave A Reply

Your email address will not be published.