حيدرآباد (پ ر) قومي عوامي تحريڪ جي سربراھ اياز لطيف پليجي چيو ته ڪراچي، حيدرآباد، سکر، ميرپور خاص، ٺٽو، سجاول، لاڙڪاڻو ،بدين ضلعن سميت سڄي سنڌ جي سمورن ضلعن ۾ لکين غير قانوني پرڏيھي ويٺل آھن، انھن کي نيڪال نه پيو ڪيو وڃي، آپريشن جي نالي ۾ ڊرامو ڪيو پيو وڃي، پيپلز پارٽي اٽي، لٽي ۽ اجھي جا ڪوڙا نعرا ھڻي سنڌ جا وسيلا وڪڻي ڇڏيا ۽ سنڌي ماڻھن کي پنھنجي وطن ۾ بي وطن ڪيو، ڊجيٽل آدمشماري جي نالي ۾ سنڌي ماڻھن کي اقليت ۾ تبديل ڪرڻ جي ڪوشش ڪئي، ڪرپشن جو راڄ قائم ڪري ھر کاتي جي ڪارڪردگي عوام دشمن بڻائي ڇڏي آھي، دنيا ۾ اليڪشن ڪارڪردگي جي بنياد تي وڙھي ويندي آھي سنڌ ۾ ۽ پاڪستان ۾ عوام جي راءِ تي ڌاڙا ھنيا وڃن ٿا، نتيجا تبديل ڪري عوام دشمن طاقتون اقتدار تي قابض ڪيون وڃن ٿيونم سنڌ ۾ تمام گھڻي مھنگائي آھي، اٽو ۽ کاڌي پيتي جون شيون تمام گھڻيون مھانگايون ٿي ويون آھن.. پيپلز پارٽي 15 سالن جي اقتداري دؤر ۾ ڪي به روزگار جا وسيلا پيدا نہ ڪري سگھي آھي. زرعي تباھي جي ڪري سنڌ ۾ بک ۽ بدحالي آھي.
