ڪراچي(رپورٽر) سنڌ ۾ پ پ خلاف سياسي محاذ لاءِ سياسي پارٽيون سرگرم ٿي ويون، سياسي اڳواڻن پاران پارٽيون مٽائڻ جي موسم اچي وئي، پارٽين ۾ شموليتون وڌي ويون، خبر موجب نواز ليگ اڳواڻن بشير ميمڻ ۽ کيئل داس ڪوهستاني پ پ سان تعلق رکندڙ سردار تيغو خان تيغاڻي سان ملاقات ڪري کيس نواز ليگ ۾ شموليت جي دعوت ڏني جيڪا هن قبول ڪندي نواز ليگ ۾ شموليت اختيار ڪري ورتي، اهڙي طرح ڪشمور ۾ سياسي ۽ برادرين ۾ اثر رسوخ رکندڙ تيغو خان تيغاڻي نواز ليگ ۾ شامل ٿيڻ بعد پنهنجي پيغام ۾ چيو آهي ته هو ايندڙ چونڊون نواز ليگ جي ٽڪيٽ تان وڙهندو، ٻئي طرف نواز ليگ اڳواڻن بشير ميمڻ ۽ کيئل داس ڪوهستاني پي ٽي آءِ جي اڳوڻي ايم پي اي محمد علي عزيز سان ڪراچي ۾ ملاقات ڪري کيس نواز ليگ ۾ شموليت جي دعوت ڏني جڏهن ته ڪراچي مان پ پ سان تعلق رکندڙ اڳوڻو ايم پي اي اختر جدون به پارٽي کي الوداع ڪري نواز ليگ ۾ شامل ٿي ويو آهي.
