تل ابيب (م ڊ) اسرائيل غزا جي هزارين فلسطينين جي نوڪرين جي پرمٽ رد ڪري ڇڏي. اسرائيلي ميڊيا موجب روز 18 هزار فلسطيني غزا مان نوڪري ڪرڻ اسرائيل ايندا هئا، 7 آڪٽوبر جي حملن کان پوءِ اسرائيل ۾ موجود غزا جي 3 هزار پورهيت فلسطينين کي حراست ۾ ورتو ويو. پر انهن مان ڪيترن کي آزاد ڪرڻ جي دعويٰ ڪئي وئي پر فلسطينين جي موبائيل، رقم ۽ ٻيون شيون اسرائيلي اختيارين واپس نه ڪيون. هاڻي غزا جي فلسطينين جي نوڪرين جي پرمٽ رد ڪئي وئي آهي ۽ غزا جي اختيارين سان مڪمل طور تي رابطا به ختم ڪري ڇڏيا.
-
اڳوڻو ڀارتي ڪرڪيٽر عرفان پٺاڻ فلسطيني جي حق ۾ ميدان تي اچي ويو
ممبئي ( م ڊ ) غزا تي اسرائيلي جارحيت خلاف سڄي دنيا جا سياستدان، فنڪار توڙي رانديگر آواز اٿاري رهيا آهن. ڀارتي حڪومت سميت اتان جي اڪثريت هن وقت اسرائيل فلسطين جنگ ۾ اسرائيلين سان گڏ آهي ۽ فلسطين سان نفرت جو اظهار سوشل ميڊيا تي جاري بيانن ذريعي ڪيو پيو وڃي. پر ان جي ابتڙ اڳوڻي ڀارتي ڪرڪيٽر عرفان پٺاڻ فلسطيني ٻارن ۽ غزا ۾ جاري ظلمن خلاف آواز اٿاريو آهي. عرفان پٺاڻ هڪ ٽوئيٽ ۾ عالمي اڳواڻن کان متحد ٿي انهن حملن کي ختم ڪرائڻ جو مطالبو ڪيو. هن لکيو ته غزا ۾ هر ڏينهن معصوم ٻار زندگيون وڃائي رهيا آهن ۽ دنيا خاموش آهي، هڪ رانديگر طور مان رڳو آواز اٿاري سگهان ٿو پر هاڻ وقت اچي ويو آهي ته عالمي اڳواڻ متحد ٿي وڃن ۽ قتل عام بند ڪرائين.
