ڪراچي(رپورٽر) پاڪستان پيپلز پارٽي جي چيئرمين بلاول ڀٽو زرداري چيو آهي ته مرحوم راشد رباني انهن جيالن مان هڪ هو جيڪو پارٽي لاءِ ڪرنگهي جي هڏي جي حيثيت رکندا آهن. ميڊيا سيل بلاول هائوس طرفان جاري بيان مطابق بلاول ڀٽو زرداري پارٽي جي اهم اڳواڻ مرحوم راشد رباني کي سندس ٽين ورسي تي خراج عقيدت پيش ڪندي چيو ته راشد رباني مرحوم جون پارٽي لاءِ خدمتون ۽ جمهوريت لاءِ قربانيون گهڻي وقت تائين ياد رکيون وينديون. هن چيو ته آمريت جون ڪاريون راتيون هجن يا دهشتگردي جا بدترين ڏينهن مرحوم راشد رباني انهن جيالن مان هڪ هو جن ڪراچي ۾ پارٽي جي جهنڊي کي ڪڏهن به جهڪڻ نه ڏنو. هن چيو ته مرحوم راشد رباني پارٽي قيادت ۽ جيالن جي دلين ۾ هميشه زنده رهندو.
